Kiberjinoyatlarga qarshi kurash: Toshkent viloyati prokuratura va ichki ishlar organlari xodimlari uchun amaliy o‘quv mashg‘uloti tashkil etildi

O‘zbekiston Respublikasi Huquqni muhofaza qilish akademiyasining Raqamli kriminalistika ilmiy-tadqiqot instituti xodimlari tomonidan Toshkent viloyatida “Axborot texnologiyalari yordamida sodir etilgan jinoyatchilik ahvoli, amaliyotdagi muammolar, bu toifadagi jinoyatlarni fosh etish va tergov qilish samaradorligini oshirish” mavzusida sayyor o‘quv-amaliy mashg‘ulotlar tashkil etildi.

Mashg‘ulotlarda Toshkent viloyati prokuraturasi va ichki ishlar organlari rahbarlari, tuman (shahar) prokuraturalari va ichki ishlar bo‘limlari tergovchilari, yosh mutaxassislar hamda Iqtisodiy jinoyatlarga qarshi kurashish departamenti xodimlari faol ishtirok etishdi.

Tadbir doirasida tergovchilar va prokurorlar uchun kiberjinoyatlarni fosh etish hamda tergov qilishdagi dolzarb masalalar, zamonaviy raqamli texnologiyalar hamda maxsus texnik vositalarni samarali qo‘llash usullari haqida amaliy ma’lumotlar berildi. Jumladan, hodisa joyini virtual holda ko‘rib chiqish imkonini beradigan 360 gradusli sferik videokamera imkoniyatlari namoyish etildi.

Shuningdek, ishtirokchilarga Akademiya tomonidan ishlab chiqilgan “Axborot texnologiyalari sohasidagi jinoyat ishlarini yuritishda tergovchining yon daftari” nomli amaliy qo‘llanmaning mazmuni va undan amaliyotda foydalanish afzalliklari tushuntirildi.

Mashg‘ulotlar davomida raqamli dalillar bilan ishlashga mo‘ljallangan ilg‘or texnik va dasturiy vositalar taqdim etildi va ularning har biri bo‘yicha amaliy ko‘nikmalar shakllantirildi.

Huquqni muhofaza qilish akademiyasi tomonidan joylardagi tergov organlari uchun o‘tkaziladigan amaliy mashg‘ulotlar kelgusida ham izchil ravishda davom ettiriladi.