Ҳуқуқни муҳофаза қилиш академияси Кенгашининг навбатдаги мажлиси бўлиб ўтди

2025 йилнинг 1 ярмидаги фаолият натижаларини сарҳисоб қилиш ва келгусидаги устувор вазифаларни белгилаш мақсадида Ҳуқуқни муҳофаза қилиш академияси Кенгашининг навбатдаги мажлиси бўлиб ўтди.

Мажлисда Академиянинг кадрларни тайёрлаш, қайта тайёрлаш ва малакасини ошириш, фаолиятни илмий-услубий ва психологик жиҳатдан таъминлаш, ўқув-тарбия жараёнлари самарадорлигини оширишга қаратилган ишлар атрофлича таҳлил қилинди. Шу билан бирга, 2025 йилнинг иккинчи ярми учун белгиланган вазифалар юзасидан аниқ чора-тадбирлар белгилаб олинди.

Кенгаш йиғилишида тадқиқот ишларини белгиланган муддатларда якунламасдан, Академия низоми талабларини бузгани учун 24 нафар мустақил изланувчи мустақил изланувчилар сафидан чиқарилиши тўғрисида қарор қабул қилинди.

Шунингдек, Академия профессор-ўқитувчилари, таянч докторантлар ва мустақил изланувчилар томонидан тайёрланган ўқув адабиётлари, монографиялар ва тадқиқот ишлари муҳокама қилинди ҳамда уларни нашрга тавсия этиш юзасидан тегишли қарорлар қабул қилинди. Хусусан, “Рақамли криминалистика” халқаро илмий-амалий журнали таҳририятининг Низоми лойиҳаси маъқулланди.

Мажлисда бакалавриат талабаларини Ўзбекистон Республикаси Президентининг давлат стипендияси ва бошқа давлат стипендияларига номзод сифатида тавсия этиш, шунингдек, прокуратура органлари тармоқларида стажировка ўтаган Академия ходимларининг ҳисоботларини тинглаш каби масалалар ҳам кўриб чиқилди.

Шунингдек, Академияда келгусида амалга оширилиши режалаштирилаётган амалий тадқиқот лойиҳалари кўриб чиқилиб, мажлис кун тартибидаги бошқа масалалар юзасидан ҳам тегишли қарорлар қабул қилинди.