Академияда "Болаларга қарши ахборот-коммуникация технологиялари ёрдамида содир этилган жиноятлар билан боғлиқ жиноят ишларини тергов қилиш" мавзусида тренинг ташкил этилди

2025 йил 5-7 август кунлари Ҳуқуқни муҳофаза қилиш академияси томонидан ЮНИСЕФнинг Ўзбекистондаги ваколатхонаси билан ҳамкорликда, халқаро эксперт Ирина Урумова иштирокида "Болаларга қарши ахборот-коммуникация технологиялари ёрдамида содир этилган жиноятлар билан боғлиқ жиноят ишларини тергов қилиш" мавзусида тренинг ўтказилди.

Тадбирда Ўзбекистон Республикаси Миллий гвардияси, Ички ишлар вазирлиги, ИИВ Академияси, Жамоат хавфсизлиги университети ва Ҳуқуқни муҳофаза қилиш академияси вакиллари иштирок этдилар.

Тадбир доирасида ушбу соҳадаги халқаро стандартлар, шу жумладан, Бола ҳуқуқлари тўғрисидаги конвенция (1989), Кибержиноятчилик тўғрисидаги Будапешт конвенцияси (2001) ва Лансарот конвенциялари (2007) таҳлил қилинди. Тренинг давомида рақамли зўравонликнинг замонавий шакллари, жабрланувчилар ва тажовузкорлар психологияси, рақамли далилларни тўплаш хусусиятлари, OSINT усулларидан фойдаланиш, вояга етмаганларга нисбатан тергов ҳаракатлари тактикаси, вояга етмаганларга нисбатан жиноятларни тергов қилишда суд компьютер-техникавий экспертизасини ўтказишга алоҳида эътибор қаратилди.

Бундан ташқари, семинар иштирокчилари ўзаро ҳуқуқий ёрдам кўрсатиш, рақамли платформалар билан ҳамкорлик қилиш ва ахборот-коммуникация технологияларидан фойдаланган ҳолда вояга етмаганларга нисбатан содир этиладиган жиноятларга қарши курашишда махсус дастурлардан фойдаланиш масалалари билан танишиб ўтдилар.

Тренинг якунида иштирокчиларга тегишли сертификатлар топширилди.