Ўзбекистон Республикаси
Ҳуқуқни муҳофаза қилиш академияси
Ҳуқуқни муҳофаза қилиш академияси ISO 37001:2025 халқаро стандартини жорий этиш лойиҳасини бошлади
Ўзбекистон Республикаси Ҳуқуқни муҳофаза қилиш академиясида ISO 37001:2025 халқаро стандарти талабларига мувофиқ пора олишга қарши курашиш бошқарув тизимини жорий этиш бўйича йирик лойиҳа старт олди. Мазкур лойиҳа ALFAKON SYSTEMS компаниясининг методологик ва техник кўмаги билан амалга оширилмоқда.
Тадбир Европа Иттифоқи ва Германия Федерал иқтисодий ҳамкорлик ва тараққиёт вазирлиги (БМЗ)нинг молиявий кўмагида GIZ Германия халқаро ҳамкорлик жамияти билан ҳамкорликда амалга оширилаётган “Ўзбекистонда Давлат бошқарувини такомиллаштириш: Коррупцияни инклюзив қамровда олдини олиш” лойиҳаси доирасида ташкил этилди.
Лойиҳанинг мақсади – коррупциявий хатарларни олдини олиш бўйича комплекс тизим яратиш, бошқарув ва ўқув жараёнларининг шаффофлигини ошириш, Академиянинг ишбилармонлик обрўсини мустаҳкамлаш, шунингдек, миллий ва халқаро антикоррупция комплаенс талабларига мувофиқ бўлишдир.
Лойиҳа доирасида қуйидагилар амалга оширилади: мавжуд жараёнларни комплекс баҳолаш; антикоррупция сиёсати ва низомларини ишлаб чиқиш ва жорий этиш; барча даражадаги ходимларни ўқитиш; ички аудитни тайёрлаш ва ўтказиш; ташқи сертификатлаштириш жараёнини қўллаб-қувватлаш.
Кутилмоқдаки, лойиҳа якунларига кўра, Академия ISO 37001 халқаро стандартининг барча талаблари мувофиқлигига эришади ва ходимларнинг камида 80 %ини ўқитиш ва антикоррупция маданиятини шакллантириш жараёнига жалб этади.
ISO 37001 стандартини, жумладан, келгусида ҳуқуқни муҳофаза қилувчи органлар ходимларини тайёрлашга йўналтирилган таълим муҳитига жорий этиш стратегик аҳамиятга эга. У фақатгина расмий низомлар билан чекланиб қолмай, коррупцияга нисбатан мутлақ тоқатсизлик маданиятини шакллантиришга хизмат қилади ва бу маданият Академия битирувчилари томонидан уларнинг профессионал фаолиятида татбиқ этилади.
Мазкур қадам Академиянинг ҳуқуқни муҳофаза қилиш соҳаси учун кадрлар тайёрлаш тизимида барқарор антикоррупция маданиятини шакллантириш бўйича стратегик курсининг бир қисми ҳисобланади.