Жиноятчилик ҳақидаги ҳисоботларни ишлаб чиқиш, йиғиш ва ҳисобдорлик соҳасидаги салоҳиятни мустаҳкамлаш

Бош прокуратура Академияси Жиноятларнинг содир этилиши сабабларини тизимли таҳлил қилиш ва ўрганиш маркази ходимлари жорий йилнинг 4-6 декабрь кунлари БМТнинг Наркотиклар ва жиноятчилик бўйича бошқармасининг Марказий Осиё бўйича минтақавий ваколатхонаси томонидан ташкил этилган “Жиноятчилик ҳақидаги ҳисоботларни ишлаб чиқиш, йиғиш ва ҳисобдорлик соҳасидаги салоҳиятни мустаҳкамлаш” мавзусидаги минтақавий семинарда иштирок этишди.

Тадбирда Ўзбекистон Республикасининг Олий суди, ИИВ ва Статистика бўйича давлат қўмитаси вакиллари ҳамда Қозоғистон, Қирғизистон, Тожикистон ва Туркманистон давлатларининг ҳуқуқни муҳофаза қилувчи органлари ходимлари қатнашди.

Семинар БМТнинг Наркотиклар ва жиноятчилик бўйича бошқармасининг маълумотларни ишлаб чиқиш ва тарқатиш бўлими халқаро экспертлари М.Яндл, У.Акакзиа ва У.Рахмонбердиев томонидан ўтказилди.

Жиноятларнинг статистик халқаро классификацияси дунёнинг турли давлатларида жиноятларни ҳисобга олишда мавжуд статистик маълумотларни умумий классифакторлар асосида тизимлаш ва халқаро таққосланишини таъминлаш, миллий ва халқаро даражадаги таҳлилий имкониятларни кенгайтиришда ифодаланади.

Тадбир давомида жиноят ҳақидаги статистик маълумотларни йиғиш, таҳлил қилиш ва тақдим қилиш тизимини жорий қилиш масалалари ҳамда халқаро жиноятлар классификациясини ишлаб чиқишдаги муаммолар ва уларнинг ечимини топиш масалалари муҳокама қилинди.

Ўқув машғулотлари натижаси бўйича тингловчиларга намунадаги сертификатлар топширилди.