Академияда “Қишлоқ хўжалиги, озиқ-овқат хавфсизлиги ва сув истеъмоли соҳасида назорат қилишнинг долзарб масалалари” мавзусига бағишланган вебинар ўтказилди

Бош прокуратура Академиясида Бош прокуратура ҳузуридаги Агросаноат мажмуи ва озиқ-овқат хавфсизлиги таъминланиши устидан назорат қилиш инспекцияси билан ҳамкорликда жойлардаги Инспекция ходимлари иштирокида видеоконференцалоқа режимида республика семинар тренинги бўлиб ўтди.

Семинар тренингда Қишлоқ хўжалиги ва Сув хўжалиги вазирликлари, “Ўзпахтасаноат” АЖ, Ўздонмаҳсулот” АК каби мутасадди идораларнинг малакали мутахассис-экспертлари ўзларининг маърузалари билан қатнашдилар.

Амалиётда мавжуд муаммолар, юзага келаётган долзарб масалалар таҳлилидан келиб чиққан ҳолда, семинар иштирокчиларининг асосий эътибори қишлоқ хўжалиги ва озиқ-овқат хавфсизлиги соҳасида давлат сиёсатининг асосий йўналишлари, пахта ва дон экинлари уруғларини сифатли тайёрлаш, сақлаш ҳамда фермер хўжаликларига етказиб беришнинг ўзига хос жиҳатлари, сув ресурсларидан оқилона фойдаланиш ва уларни муҳофаза қилиш, ерларнинг мелиоратив ҳолати яхшиланишини таъминлаш бўйича кўрилаётган чора-тадбирлар муҳокамасига қаратилди.

Семинар қизғин баҳс-мунозара руҳида ўтказилиб, иштирокчилар ўзларини қизиқтирган саволларга жавоб олдилар ва амалдаги қонунчилик ҳамда механизмларни такомиллаштириш бўйича ўз таклифларини билдирдилар.

Иштирокчиларнинг фикрига кўра, бу каби тадбирлар келгусида мавжуд муаммолар ва уларнинг ечимини муҳокама қилиш бўйича майдон бўлиб хизмат қилади.