Жиноий даромадларни легаллаштириш ва терроризмни молиялаштиришга қарши кураш соҳасида миллий экспертларни тайёрлаш бўйича тренинг ўтказилди

Ҳуқуқни муҳофаза қилиш академияси томонидан “Минтақавий мулоқот” ХННТнинг Ўзбекистондаги филиали билан ҳамкорликда Академия профессор-ўқитувчилари (19-21 август) ҳамда молиявий ва номолиявий ташкилотлар комплаенс хизматлари ходимлари учун (25-27 август) “Жиноий даромадларни легаллаштириш ва терроризмни молиялаштиришга қарши кураш соҳасида миллий экспертларни тайёрлаш” мавзусида семинар-тренинглар туркуми ўтказилди.

Семинар-тренинглар жиноий даромадларни легаллаштириш ва терроризмни молиялаштиришга қарши курашиш соҳасида ваколатли давлат органларига миллий экспертларни тайёрлаш масалалари бўйича Академия профессор-ўқитувчиларининг кўникмаларни ошириш, шунингдек молиявий ва номолиявий ташкилотлар маъсул ходимларининг билимларини янада мустаҳкамлаш мақсадида ташкил этилди.

Тадбирларда Академия профессор-ўқитувчилари, шунингдек банк, нобанк кредит, тўлов, суғурта, лизинг, аудиторлик, риэлторлик, адвокатлик ташкилотлари, қимматли қоғозлар бозорининг профессионал иштирокчилари, крипто-провайдерлар ҳамда хусусий нотариусларнинг комплаенс хизмати ходимлари иштирок этди.

Тренинг АҚШлик етакчи халқаро эксперт Дэвид Кейкен томонидан олиб борилиб, жиноий даромадларни легаллаштириш ва терроризмни молиялаштиришга қарши курашиш соҳасидаги ўз амалий тажрибасига асосланган ҳолда, ушбу турдаги жиноятларнинг молиявий жиҳатларини тергов қилиш усуллари борасида назарий ва амалий машғулотлар ўтказилди.

Тадбир очиқ ва конструктив интерактив шаклида ўтказилиб, жиноят йўли билан топилган даромадларни легаллаштириш ҳамда терроризмни молиялаштиришга қарши курашиш соҳасида иш самарадорлигини ошириш мақсадида илғор хорижий тажриба ва муваффақиятли амалиётларни жорий этишга хизмат қилади.