UNODC ва ARIN-WCA вебинари: активларни қайтариш борасида Нигерия тажрибаси

БМТнинг Гиёҳвандлик ва жиноятчилик бўйича бошқармаси (UNODC) Минтақавий ваколатхонаси ҳамда Ғарбий ва Марказий Осиё давлатларининг Активларни қайтариш бўйича идоралараро тармоғи (ARIN-WCA) томонидан (тармоқ Котибияти вазифасини Ўзбекистон Республикаси Ҳуқуқни муҳофаза қилиш академияси бажаради), «Активларни қайтариш соҳасида Нигерия тажрибаси» мавзусида вебинар ўтказилди.

Спикерлар сифатида 2016–2023 йилларда Нигерия Президентининг махсус маслаҳатчиси, ҳозирда Буюк Британиянинг Сассекс университети докторанти Жулет Ибекаку-Нвагву ҳамда 2003–2013 йилларда Нигерия Иқтисодий ва молиявий жиноятларга қарши кураш комиссиясининг илк Бош котиби, ҳозирда Emmanuel Akomaie & Co. адвокатлик фирмаси раҳбари Эммануэл Акомае қатнашдилар.

Экспертлар Нигериянинг активларни қайтариш борасидаги амалий тажрибаси билан ўртоқлашиб, халқаро ҳамкорликда қўлланилиши мумкин бўлган самарали механизмларни батафсил ёритиб бердилар.

Вебинар Ўзбекистон, Қозоғистон, Эрон, Қирғизистон, Покистон, Тожикистон ва Туркманистон вакилларини бирлаштирди. Мулоқот очиқ ва самарали тарзда ўтди: иштирокчилар долзарб масалаларга атрофлича жавоблар ҳамда аниқ тавсиялар олдилар.

Мазкур вебинар давлатлар ўртасидаги ҳамкорликни янада кучайтириш ҳамда активларни қайтариш соҳасида самарали халқаро механизмларни шакллантиришга хизмат қилади.