Академияда терроризм билан боғлиқ жиноятларни тергов қилиш бўйича халқаро ўқув курси ўтказилди

Ўзбекистон Республикаси Ҳуқуқни муҳофаза қилиш академиясида АҚШ Адлия департаменти Жиноятларни тергов қилиш бўйича малака оширишга кўмак кўрсатиш халқаро дастури (ICITAP) доирасида «Терроризм билан боғлиқ жиноятларни тергов қилиш бўйича раҳбарлар ва терговчиларни тайёрлаш» мавзусида ўқув курси ташкил этилди.

Курс АҚШ ва Буюк Британия мутахассислари ҳамда Академия профессор-ўқитувчилари иштирокида ўтказилиб, 4 кун давом этди.

Курс тингловчилари сифатида прокуратура органлари ва Давлат хавфсизлик хизмати тергов бўлинмалари ходимлари қатнашдилар.

Дарс жараёнида тингловчилар мазкур тоифадаги ишлар юзасидан тергов ҳаракатларини амалга оширишда инсон ҳуқуқларини таъминлаш, тергов жараёнида иштирок этувчи шахсларнинг ҳаракатларини ҳуқуқий баҳолаш, ашёвий далилларни аниқлаш ва уларни процессуал расмийлаштириш бўйича зарур билим ва амалий кўникмаларга эга бўлдилар. Шунингдек, терроризмга қарши кураш соҳасидаги долзарб муаммолар, илғор хорижий тажриба ва самарали амалиётлар билан танишдилар.

Курс якунлари бўйича Академия раҳбарияти ва АҚШ Адлия вазирлиги вакиллари томонидан тингловчиларга сертификатлар топширилди. Шунингдек, келгусида ҳамкорликда қўшма тадбирларни давом эттириш юзасидан келишувга эришилди.