Ҳудудларда хавфсиз муҳитни мустаҳкамлашга қаратилган манзилли чора-тадбирлар

Ҳуқуқни муҳофаза қилиш академияси ҳудудларда Ўзбекистон Республикаси Президентининг
2025 йил 3 январдаги № ПҚ–1-сон «Республика маҳаллаларида 2025 йилда хавфсиз муҳитни яратиш ва ҳуқуқбузарликларни барвақт олдини олиш тизими самарадорлигини янада ошириш чора-тадбирлари тўғрисида»ги қарори ҳамда 2025 йил 18 августдаги № ПҚ–253-сон «Ўзбекистон Республикаси Президентининг айрим қарорларига маҳаллаларда жиноятчиликнинг барвақт олдини олиш тизими натижадорлигини янада оширишга қаратилган ўзгартириш ва қўшимчалар киритиш тўғрисида»ги қарорлари ижроси доирасида изчил илмий-амалий ишлар олиб бормоқда.

Академия профессор-ўқитувчиларидан иборат ишчи гуруҳ Тошкент вилоятининг Ангрен ва Олмалиқ шаҳарларидаги «Тараққиёт», «Мирзо Улуғбек» ва «А.Навоий» маҳаллаларида комплекс тадқиқотлар ўтказди.

Таҳлил жараёнида ҳуқуқбузарликлар даражасига таъсир этувчи омиллар атрофлича ўрганилди, профилактика чораларининг самарадорлиги баҳоланди, шунингдек, аҳоли дуч келаётган ижтимоий-маиший муаммолар аниқланди.

Тадқиқотлар натижаларига кўра, ҳар бир ҳудуднинг ўзига хос жиҳатларини ҳисобга олган ҳолда илмий асосланган таклиф ва тавсиялар ишлаб чиқилди. Шу асосда маҳаллаларда хавфсиз муҳит яратиш ва ҳуқуқбузарликларни олдини олишга қаратилган манзилли «йўл хариталари» тайёрланди.

Келгусида Академия ҳудудлар билан илмий-амалий ҳамкорликни мустаҳкамлаш, профилактика ишларини ташкил этишнинг замонавий ёндашувларини жорий қилиш ва маҳаллаларда хавфсизликни таъминлашнинг барқарор тизимини шакллантиришга кўмаклашишни изчил давом эттиради.