Европа мамлакатлари, ЕХҲТ ва ЮНИСЕФнинг Бола ҳуқуқлари бўйича вакиллари Академияга ташриф буюрди

Бола ҳуқуқлари бўйича Европа омбудсманлар тармоғи (ENOC) раиси, Финляндия Болалар омбудсмани Элина Пеккаринен, Норвегия Болалар омбудсмани ўринбосари Ивар Стоккерайт, Хорватия Болалар омбудсмани Хеленка Пирнат Драгичевич, шунингдек, ЕХҲТнинг Ўзбекистондаги лойиҳалари координатори Антти Карттунен ва UNICEFнинг Ўзбекистондаги ваколатхонаси вакиллари Ҳуқуқни муҳофаза қилиш академиясига ташриф буюришди.

Ташриф чоғида меҳмонлар Академия фаолиятининг асосий йўналишлари, прокуратура ва тергов органлари ходимларини тайёрлаш, қайта тайёрлаш ҳамда малакасини ошириш тизими билан танишдилар.

Шунингдек, улар амалий кўникмаларни ривожлантиришга қаратилган инновацион таълим инфратузилмаси, ўқув жараёнида қўлланиладиган технологиялар ва услублар ҳақида маълумот олдилар.

Интернет тармоғида вояга етмаганларга нисбатан зўравонликка қарши курашиш соҳасида Академиянинг Рақамли криминалистика илмий-тадқиқот институти фаолияти меҳмонларда алоҳида қизиқиш уйғотди. Академия мутахассислари виртуал маконда болалар порнографиясини тарқатиш ҳолатларини аниқлаш ва олдини олиш бўйича рақамли криминалистиканинг махсус воситаларини намойиш этдилар.

Учрашув давомида томонлар ҳамкорликнинг истиқболли йўналишларини муҳокама қилиб, прокуратура органлари ходимлари салоҳиятини ошириш масалалари юзасидан фикр алмашишди.