Академияда UNODC ва ARIN–WCA тармоғи ҳамкорлигида вебинар ташкил этилди

БМТ Гиёҳвандлик ва жиноятчилик бўйича бошқармаси (UNODC) Минтақавий ваколатхонаси ҳамда Ғарбий ва Марказий Осиё давлатларининг Активларни қайтариш бўйича идоралараро тармоғи (ARIN–WCA) ҳамкорлигида “Активларни қайтаришда юқори самарадорликни таъминлаш: Гонконг тажрибаси” мавзусида вебинар ўтказилди.

Вебинарда Гонконг махсус маъмурий ҳудуди Коррупцияга қарши мустақил комиссияси (ICAC) вакиллари – Активларни қайтариш бошқармаси раҳбари Судҳир Гидвани ва катта терговчи Гавин Лау қатнашди. Улар Гонконгнинг Активларни қайтариш масалалари юзасидан ҳуқуқий асослари, амалий тажрибалари ҳақида тақдимот билан маъруза қилишди.

Тадбирда активларни мусодара қилиш жараёнлари, мулкнинг номинал эгалари ва оффшор ҳудудларда яширилган активларни аниқлаш, халқаро ҳуқуқий ёрдам сўровларини тайёрлаш ва юбориш, мусодара қилинган активларни бошқариш каби масалалар кўриб чиқилди.

Ўзбекистон, Қозоғистон, Эрон, Қирғизистон, Покистон, Тожикистон ва Туркманистондан вакиллар иштирок этиб, вебинар давомида иштирокчилар ўзларини қизиқтирган саволларга жавоблар олишди.

Ўзбекистон Республикаси Ҳуқуқни муҳофаза қилиш академияси Тармоқнинг Котибияти сифатида минтақавий ҳамкорликни мувофиқлаштириш, ахборот ва тажриба алмашиш жараёнларини йўлга қўйиш ҳамда тармоқнинг самарали фаолияти учун муҳим чора-тадбирларни кўриб келмоқда.