Маҳаллаларда криминоген вазият комплекс мониторинги давом этмоқда

Ҳуқуқни муҳофаза қилиш академияси томонидан маҳаллаларда криминоген вазиятни илмий ёндашувлар асосида ўрганиш бўйича тизимли ишлар давом эттирилмоқда.

Академия бошлиғининг ўринбосари Ш.Б.Мустафаев бошчилигидаги ишчи гуруҳи томонидан Тошкент вилоятининг Ангрен шаҳрида Ангрен шаҳридаги “Тараққиёт” ва “Мирзо Улуғбек” маҳаллаларини ўрганиш ишлари ўтказилиб, масъул ходимлар ва маҳалла фаоллари иштирокида ҳуқуқбузарлик ва жиноятларни ўз вақтида аниқлаш ҳамда уларнинг олдини олиш масалалари кўриб чиқилди.

Мутахассислар маҳалла ҳудудида беш йил давомида содир этилган жиноятларни таҳлил қилиб, ҳуқуқбузарликлар сабаблари, уларнинг олдини олиш чоралари ҳамда профилактик ҳисобда турган шахслар билан ишлаш жараёнларини атрофлича ўрганишди. Мониторинг натижаларига кўра, криминоген вазиятни яхшилаш, профилактик ишлар самарадорлигини ошириш ва маҳаллада жамоат хавфсизлигини таъминлаш бўйича таклиф ва тавсиялар берилди.

Шунингдек, Тошкент вилоятининг Ангрен шаҳрининг “Ёшлик”, “Янги гўшсой” ҳамда “Озодлик” маҳаллаларида содир этилган ҳамда олдини олиш мумкин бўлган жиноятлар хусусида маҳалла еттилиги аъзоларининг ҳар бири билан суҳбатлар ўтказилиб жиноятларни олдини олиш борасидаги фикр ва мулоҳазалари эшитилиб, маҳалла ҳудудида жиноятларни содир этилишини олдини олиш, аҳолининг ҳуқуқий маданиятини ошириш борасидаги манзилли таклифлар берилди.

Юқорида келтирилган тадбирлар Академия ишчи гуруҳи томонидан Президентимизнинг 2025 йил
3 январдаги “Республика маҳаллаларида хавфсиз муҳит яратиш ва ҳуқуқбузарликларнинг барвақт олдини олиш тизими самарадорлигини янада ошириш чора-тадбирлари тўғрисида”ги ПҚ–1-сон ҳамда 2025 йил
18 августдаги “Ўзбекистон Республикаси Президентининг айрим қарорларига маҳаллаларда жиноятчиликнинг барвақт олдини олиш тизими натижадорлигини янада оширишга қаратилган ўзгартириш ва қўшимчалар киритиш тўғрисида”ги ПҚ–253-сон қарорларида белгиланган вазифаларни амалга ошириш доирасида амалга оширилди.