Ички ишлар органлари тергов бўлимлари раҳбар кадрларини ўқитиш ташкил этилди

Ўзбекистон Республикаси Президентининг 2018 йил 29 июнда Олмазор туманига ташрифи чоғида берган топшириғига мувофиқ, Бош прокуратура Академияси томонидан ички ишлар органлари туман (шаҳар) тергов бўлимлари бошлиқлари учун илк маротаба икки ҳафталик малака ошириш курслари ташкил этилди.

Мазкур курслар дастури ички ишлар органлари туман (шаҳар) тергов бўлимларининг ҳуқуқни қўллаш амалиёти ва уларнинг фаолиятида мавжуд бўлган тизимли муаммо ва камчиликларни таҳлил қилиш асосида шакллантирилди.

Амалиётга йўналтирилган ушбу курслар давомида тергов фаолиятини ташкил этишга қаратилган вазиятли тренинглар, гуруҳ лойиҳалари, кейс каби ўқитиш методларини ўз ичига олган интерфаол ўқитиш тадбирлари амалга оширилмоқда.

Шунингдек, курслар доирасида ички ишлар органлари ходимларининг ишларни ташкил қилиш ва бошқариш, тизимли таҳлил ва танқидий фикрлаш бўйича компетенцияларини ошириш мақсадида амалий машғулотлар ўтказилмоқда.

Ўқув курслари якунида тингловчиларга тегишли намунадаги сертификатлар топширилади.