Академияда "Инқирозгача: жамоат жойларини ҳимоя қилиш" минтақавий семинари бошланди

Ўзбекистон Республикаси Ҳуқуқни муҳофаза қилиш академиясида "Инқирозгача: жамоат жойларини ҳимоя қилиш" мавзусида минтақавий семинар ўз ишини бошлади. Семинар Европа Иттифоқининг Ўзбекистон Республикасидаги Вакиллиги кўмагида ҳамда Жиноятчилик ва терроризмга қарши курашиш бўйича EU-ACT дастури доирасида ташкил этилган бўлиб, ушбу дастур Европа ва миллий мутахассисларнинг жиноятчилик ва терроризмга қарши саъй-ҳаракатларини уйғунлаштиради.

2025 йил 22–26 сентябрь кунлари давом этадиган ушбу тадбирни хавфсизлик соҳасида кўп йиллик тажрибага эга Европа Иттифоқи экспертлари олиб бормоқда.

Семинар минтақадаги мутахассислар мулоқоти учун самарали майдонга айланди. Унда Ўзбекистон, Қозоғистон, Қирғизистон ва Тожикистон ҳуқуқни муҳофаза қилиш органлари, тегишли вазирлик ва идоралар вакиллари иштирок этмоқда. Шу тариқа, семинар нафақат ўқув, балки амалий йўналтирилган ва минтақавий хусусиятга эга бўлиб, муҳокама этилаётган ёндашувлар ва воситалар ҳар бир давлат шароитидан келиб чиқиб қўлланилиши мумкин.

Семинарнинг асосий мақсади – минтақавий хавфсизликни мустаҳкамлаш ва жамоат жойларини эҳтимолли террористик таҳдидлардан ҳимоя қилиш бўйича мутахассисларнинг билим ва кўникмаларини оширишдир. Алоҳида эътибор инқирозли вазиятларнинг олдини олиш, реакция чораларини такомиллаштириш ва илғор Европа тажрибасини қўллаш масалаларига қаратилмоқда.

Беш кунлик дастур доирасида иштирокчилар қуйидаги асосий йўналишларни ўрганадилар: террористлар учун эҳтимолли "осон нишон" бўлиши мумкин бўлган объектларни аниқлаш ва таҳлил қилиш; хавфсизлик аудитлари – хатарлар таҳлили, камчиликларни аниқлаш ва тавсиялар ишлаб чиқиш; реакция режаларини ишлаб чиқиш ва жорий этиш, масъулиятларни тақсимлаш ва идоралараро ҳамкорликни таъминлаш; олдини олишга қаратилган ҳуқуқий чоралар; терроризмга қарши ихтисослаштирилган суд органлари фаолияти; Европа тажрибаси асосида хавф-хатарларни бошқаришнинг самарали моделлари.

Дастурда маърузалар ва тақдимотлар билан бирга амалий машғулотлар ва давра суҳбатлари ҳам ташкил этилмоқда. Бу эса назарий билимларни мустаҳкамлаш ва уларни амалиётда қўллаш кўникмаларини шакллантиришга хизмат қилади.

Мазкур тадбир минтақавий ҳамкорлик учун янги имкониятлар очмоқда. Минтақа мутахассисларини ягона стандартлар асосида тайёрлаш ва илғор тажрибалар билан алмашиш Марказий Осиё давлатлари салоҳиятини террористик таҳдидларга қарши курашиш ҳамда жамоат жойлари хавфсизлигини таъминлашда сезиларли даражада мустаҳкамлайди.

Семинар беш кун давом этади. Тадбир якунида мамлакатлар делегациялари ва ЕИ экспертлари ўртасида фикр алмашувлар, баҳс-мунозаралар ва келгуси ҳамкорлик йўналишлари бўйича тавсиялар ишлаб чиқиш кўзда тутилган.

Минтақавий семинар халқаро ҳамкорликни ривожлантириш, хавфсизликни мустаҳкамлаш ва жамоат жойларини ҳимоя қилишнинг барқарор тизимини шакллантириш йўлида муҳим қадам ҳисобланади. У Европа тажрибасини минтақавий эҳтиёжлар билан уйғунлаштириш имконини яратади.