БМТ Гиёҳвандлик ва жиноятчилик бўйича бошқармаси ҳамда ARIN-WCA тармоғи ҳамкорлигидаги вебинарлар туркумининг 3-қисми ташкил этилди

БМТ Гиёҳвандлик ва жиноятчилик бўйича бошқармаси (БМТ ГЖБ) Минтақавий ваколатхонаси ҳамда Ғарбий ва Марказий Осиё давлатларининг Активларни қайтариш бўйича идоралараро тармоғи (ARIN-WCA) ҳамкорлигида “Қайтарилган жиноий активларни бошқариш ва улардан фойдаланиш жараёнида жамоатчилик ишончини сақлаб қолиш муаммолари” мавзусидаги навбатдаги онлайн вебинар ўтказилди.

Тадбирда ARIN-WCA тармоғи Котибияти (Академия), тармоқ аъзолари (Қозоғистон, Эрон, Қирғизистон, Покистон, Тожикистон ва Туркманистон) вакиллари, шунингдек Ўзбекистондаги бошқа ваколатли органлар ходимлари иштирок этдилар.

Вебинарда БМТ ГЖБ Минтақавий ваколатхонаси раҳбари Оливер Штольпе, Ўзбекистондаги “Ишонч” жамғармаси Котибияти раҳбари Жонас Аструп, мазкур жамғарма ҳузуридаги фуқаролик жамияти маслаҳат кенгаши раиси, Сайёра Ходжаева, “CLEEN” Foundation (Нигерияда полиция, жамоат хавфсизлиги, коррупцияга қарши кураш соҳасида фаолият юритувчи нодавлат ташкилоти) Питер Мадуомалар эксперт сифатида чиқиш қилиб, “Ишонч” ва “CLEEN Foundation” жамғармалари фаолияти, активларни реституция жараёнларини амалиётга йўналтириш ҳамда қайтарилган маблағлар фуқаролар манфаатлари учун хизмат қилиши каби масалалар бўйича тақдимот қилишди.

Вебинар иштирокчилари экспертлардан ўзларини қизиқтирган саволларига батафсил жавоблар олишди.