Академияда халқаро экспертлар иштирокида “Очиқ маълумотлар манбаларига (OSINT) асосан таҳлил қилиш” ўқув курси ўтказилди

Ўзбекистон Республикаси Президентининг 2025 йил
22 январдаги “Рақамли технологиялар воситасида содир этиладиган жиноятларга қарши курашиш соҳаси учун профессионал кадрлар тайёрлаш тизимини жорий этиш чора-тадбирлари тўғрисида”ги ПҚ–17-сон Қарори ижроси доирасида Ҳуқуқни муҳофаза қилиш академиясида 2025/2026 ўқув йилидан бошлаб “Киберхавфсизликни ҳуқуқий таъминлаш” магистратура мутахассислиги жорий этилди.

Таълим жараёнига рақамли технологиялар соҳасидаги жиноятларга қарши курашиш йўналишида халқаро эксперт ва мутахассислар жалб қилиб келинмоқда.

Хусусан, Академия “Киберхавфсизликни ҳуқуқий таъминлаш” магистратура мутахассислиги тингловчилари учун Буюк Британиянинг Тошкентдаги элчихонаси кўмагида Британиянинг “Ахборот барқарорлиги маркази” (Center for Information Resilience – CIR) экспертлари иштирокида «Очиқ маълумотлар манбаларига (OSINT) асосан таҳлил қилиш» мавзусида ўқув курси ўтказилди.

Курс давомида тингловчиларга OSINT технологияларидан самарали фойдаланиш, жумладан гео- ва хронолокация усуллари ҳамда сунъий интеллект имкониятларини таҳлил жараёнларида қўллаш бўйича билим ва амалий кўникмалар берилди. Машғулотларни CIR экспертлари Бенжамин ден Брабер, Ролло Коллинс ва Жек Бишоп олиб бордилар.

Курс якунида тингловчиларга сертификатлар топширилди.