Европа Иттифоқи экспертларининг Академия бакалавриат талабалари билан учрашуви

Ўзбекистон Республикаси Ҳуқуқни муҳофаза қилиш академиясида Европа Иттифоқининг "Уюшган жиноятчилик ва терроризмга қарши кураш" (EU-ACT) лойиҳаси халқаро тренер-экспертлари Эрик Беранже ва Жаухар Будрига Академия бакалавриат талабалари билан очиқ учрашув ўтказдилар. Учрашув 22–26 сентябрь кунлари Академияда Ўзбекистон, Қозоғистон, Қирғизистон ва Тожикистон вакиллари иштирокида ўтказилган "Инқироздан олдин: жамоат жойларида хавфсизликни таъминлаш" мавзусидаги минтақавий тренинглар давоми сифатида ташкил этилди.

Тадбир очиқ мулоқот шаклида ўтди. Экспертлар жамоат хавфсизлигини таъминлаш ва терроризмга қарши курашиш борасида халқаро тажрибалари билан ўртоқлашдилар. Хусусан, Эрик Беранже Францияда содир этилган террористик ҳужумлар ҳақида тўхталиб, француз махсус хизматларининг бундай жиноятларни тергов қилишдаги ваколатлари, далил тўплаш усуллари ва амалий тажрибалари ҳақида атрофлича маълумот берди.

Талабалар жамоат жойларида хавфли вазиятларни баҳолаш, тергов ҳаракатларини ташкил этиш ва самарали суриштирув олиб бориш масалалари юзасидан берилган саволларига батафсил жавоб олдилар. Ушбу учрашув бўлғуси терговчилар учун халқаро стандартлар ва амалиёт билан яқиндан танишиш имконини берди.

Ҳуқуқни муҳофаза қилиш академиясида халқаро ҳамкорлар билан бирга мунтазам ўтказиб келинаётган бундай ташаббуслар ёш кадрларнинг касбий тайёргарлигини мустаҳкамлаш ва уларда замонавий таҳдидларга муносиб жавоб бериш кўникмаларини шакллантиришда муҳим аҳамият касб этмоқда.