Тошкент вилояти маҳаллаларида криминоген вазиятни ўрганиш ишлари изчил давом эттирилмоқда

Академия ишчи гуруҳи томонидан жорий йилнинг сентябрь ойида Тошкент вилояти Олмалиқ шаҳрининг “Алишер Навоий”, “Софи Оллоёр”, “Темур Малик”, “Зарбулоқ”, “Увайсий” ҳамда Ангрен шаҳрининг “Навбаҳор”, “Ёшлик”, “Улуғбек”, “Тараққиёт” маҳаллаларида илмий ёндашув асосида ҳуқуқбузарликларни барвақт аниқлаш ҳамда уларнинг олдини олиш масалалари ўрганилди.

Гуруҳ аъзолари томонидан маҳаллалардаги ҳуқуқбузарликларнинг келиб чиқиш сабаблари, ҳуқуқбузарликларга олиб келувчи ижтимоий-иқтисодий омиллари, шунингдек, амалдаги профилактик чора-тадбирлар самарадорлиги таҳлил қилиниб, ўрганиш натижалари асосида ҳар бир маҳалланинг ўзига хос жиҳатларини инобатга олган ҳолда, жиноятчиликнинг барвақт олдини олиш бўйича илмий асосланган таклиф ва тавсиялар тайёрланди.

Мазкур таклиф ва тавсиялар умумлаштирилиб, криминоген вазиятни яхшилашга қаратилган келгусидаги йўл хариталарига киритиш учун масъулларга тақдим этилди.

Мазкур фаолият Ўзбекистон Республикаси Президентининг 2025 йил 3 январдаги
ПҚ–1-сон"2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида"ги ҳамда 2025 йил 18 августдаги ПҚ–253-сон "Ўзбекистон Республикаси Президентининг айрим қарорларига маҳаллаларда жиноятчиликнинг барвақт олдини олиш тизими натижадорлигини янада оширишга қаратилган ўзгартириш ва қўшимчалар киритиш тўғрисида"ги қарорлари ижроси доирасида тизимли давом эттирилади.