Талаба ёшлар орасида ҳуқуқбузарликларни барвақт олдини олишга бағишланган семинар бўлиб ўтди

Ҳуқуқни муҳофаза қилиш академиясида “Талаба ёшлар орасида ҳуқуқбузарликларни барвақт олдини олиш” мавзусида семинар машғулоти ташкил этилди.

Мазкур тадбир мамлакатимизда тинчлик ва осойишталикни таъминлаш, ҳуқуқбузарликларга олиб келаётган ижтимоий-маиший муаммоларни ижтимоий профилактика чоралари тизими орқали бартараф этиш ҳамда аҳолида шахсий хавфсизлик ҳиссини шакллантириш борасида амалга оширилаётган чора-тадбирлар доирасида ўтказилди.

Семинар Академия бошлиғининг ўринбосари Ш.Б.Мустафаев раислигида, Ички ишлар вазирлиги Жамоат хавфсизлиги департаменти Ёшлар масалалари бўйича бўлим бошлиғи З.Ў.Файзуллаев, Тошкент шаҳар Ички ишлар Бош бошқармаси ҲПБ бошлиғи ўринбосари Ш.А.Норматова томонидан ўтказилди. Унда Тошкент шаҳридаги олий таълим муассасаларига бириктирилган профилактика (катта) инспекторлари ва хотин-қизлар масалалари бўйича инспекторлар иштирок этдилар.

Семинар давомида ёшлар орасида жиноятчиликнинг олдини олиш, жиноятчиликнинг криминологик жиҳатлари, уни жиловлаш ва бартараф этиш механизмлари бўйича очиқ мулоқотлар олиб борилди.

Тадбир якунида намунали хизмат фаолияти билан ажралиб турган профилактика (катта) инспекторлари ва хотин-қизлар масалалари бўйича инспекторларнинг ота-оналарига ташаккурномалар ҳамда қимматбаҳо совғалар топширилди.