Минскдаги халқаро илмий-амалий конференцияда иштирок этилди

Ўзбекистон Республикаси Ҳуқуқни муҳофаза қилиш академияси вакили Минск шаҳрида Беларусь Республикаси Давлат суд экспертиза қўмитаси томонидан ташкил этилган “Миллий хавфсизликни таъминлашда суд-экспертлик фаолияти ва суд экспертизасининг ўрни ва аҳамияти” мавзусидаги III халқаро илмий-амалий конференцияда иштирок этди.

Конференцияда Беларусь Республикаси Суд-экспертиза давлат қўмитаси, Хавфсизлик кенгаши Давлат котибияти, Миллий мажлис Вакиллар палатаси, Бош прокуратура, Тергов қўмитаси ва бошқа давлат органлари вакиллари, шунингдек, Озарбайжон, Беларусь, Хитой, Россия, Тожикистон ва Ўзбекистон илмий ва эксперт ҳамжамияти вакиллари иштирок этди.

Ялпи мажлисда Ҳуқуқни муҳофаза қилиш академияси Рақамли криминалистика илмий-тадқиқот институти бўлим бошлиғи, юридик фанлар доктори, доцент Л.Ю.Югай “Ўзбекистон Республикасида рақамли криминалистиканинг ривожланиши” мавзусида маъруза қилди.

Конференция давомида суд экспертизасини рақамлаштириш, рақамли криминалистика усулларидан фойдаланиш, кадрлар таъминоти ва суд-экспертлик фаолиятининг бошқа долзарб муаммолари муҳокама қилинди.

Мазкур конференция ўзаро фикр алмашиш, илғор тажрибалар билан ўртоқлашиш, шунингдек, соҳада халқаро ҳамкорликни ривожлантиришга хизмат қилади.