Биргаликда саёҳат қилиб — янги чўққилар сари

Сўнгги йилларда мамлакатимизда туризм соҳаси изчил ривожланиб, иқтисодиётнинг муҳим стратегик тармоқларидан бирига айланмоқда. Президентимиз раҳнамолигида амалга оширилаётган ислоҳотлар натижасида ички туризмни ривожлантириш, фуқароларда Ватанга муҳаббат ва табиатга эҳтиром туйғусини мустаҳкамлашга алоҳида эътибор қаратилмоқда.

Ҳуқуқни муҳофаза қилиш академияси жамоаси мазкур ташаббусни қўллаб-қувватлаб, «Ўзбекистон бўйлаб саёҳат қил!» дастури доирасида маънавий-маърифий саёҳат уюштирди. Академия ходимлари Тошкент вилояти Бўстонлиқ туманидаги Палтау шаршарасига бориб, табиат қўйнида мазмунли дам олдилар ва жамоавий бирдамлик муҳитини мустаҳкамладилар.

Саёҳат доирасида экологик йўналишга алоҳида эътибор қаратилди. Академия ходимлари ўзида саёҳат ва ҳудудни тозалашни уйғунлаштирган плоггинг тадбирини ўтказдилар, шунингдек, кўчат экиш акциясида иштирок этиб, атроф муҳитни ободонлаштириш ва кўкаламзорлаштиришга ўз ҳиссаларини қўшдилар.

Мазкур тадбир Ўзбекистон Республикаси Президентининг 2025 йил 15 майдаги «2025–2026-йилларда сайёҳлар оқимини кескин кўпайтириш ва туристик хизматлар кўламини жадал кенгайтириш орқали туризмнинг иқтисодиётдаги ўрни ва аҳамиятини ошириш чора-тадбирлари тўғрисида»ги № ПФ-87-сон Фармони асосида ташкил этилди.

Бундай ташаббуслар Академия жамоаси аъзоларида фаол ҳаётий позицияни, табиат ва миллий қадриятларга эҳтиромни мустаҳкамлаш, ички туризмни ривожлантириш ҳамда соғлом, ижобий ва илҳомбахш муҳит яратишга хизмат қилади.