Прокуратура органлари ходимларининг халқаро терроризмга қарши кураш бўйича билим ва кўникмалари оширилди

Ўзбекистон Республикаси Ҳуқуқни муҳофаза қилиш академиясида Ўзбекистондаги Буюк Британия ва Шимолий Ирландия элчихонаси билан ҳамкорликда терроризмга қарши кураш масалаларига бағишланган махсус тренингнинг тўртинчи босқичи ўтказилди. Ушбу тадбирда жиноят ҳуқуқи ва терроризмга қарши кураш соҳасида катта амалий тажрибага эга бўлган Британиялик эксперт, жиноят ишлари бўйича маслаҳатчи М.Кэрролл иштирок этди.

Тренинг прокуратура органлари ходимларининг терроризмга қарши кураш соҳасидаги билим ва профессионал кўникмаларини ошириш, хорижий давлатларнинг ушбу соҳадаги ижобий тажрибасини, шунингдек террористик ҳаракатларни аниқлаш, тергов қилиш ва унга қарши курашиш бўйича қўлланиладиган халқаро ҳуқуқий механизмлар ва стандартларни ўрганиш мақсадида ташкил этилди.

Тадбир давомида иштирокчилар терроризмни молиялаштиришга қарши курашиш соҳасида Буюк Британия ва Ўзбекистон Республикаси қонунчилиги, Буюк Британиянинг соҳага оид тажрибаси, терроризмни молиялаштириш билан боғлиқ жиноятларни тергов қилишда далилларни йиғиш, таҳлил қилиш ва улардан исботлаш жараёнида фойдаланиш масалаларини муҳокама қилишди.

Иштирокчилар томонидан амалиётдаги терроризмни молиялаштириш билан боғлиқ реал кейсларни актив муҳокама қилиш, прокуратура органлари ходимларининг терроризм билан боғлиқ жиноятларни тергов қилишда дуч келадиган мавжуд муаммоларни аниқлаш ҳамда уларни хорижий тажрибага таянган ҳолда бартараф этиш бўйича ҳамкорликда таклифларни ишлаб чиқиш жараёни тадбирнинг амалий самарасини янада кучайтирди.

Тренинг иштирокчилар томонидан юқори баҳоланди, мазкур тадбирлар туркуми давом эттирилади.