Ўзбекистон Республикаси Ҳуқуқни муҳофаза қилиш академияси ва Янка Купала номидаги Гродно давлат университети (Беларусь Республикаси) ўртасидаги қўшма таълим дастури амалга оширилиши бошланди

Ўзбекистон Республикаси Ҳуқуқни муҳофаза қилиш академияси ҳамда Беларусь Республикасининг Янка Купала номидаги Гродно давлат университети ҳамкорлигида амалга оширилаётган бакалавриатнинг қўшма таълим дастури доирасида ўқув жараёни бошланди.

Кириш имтиҳонларини муваффақиятли топширган талабалар Беларусь Республикасининг етакчи олий таълим муассасаларидан бири – Янка Купала номидаги Гродно давлат университетида (ГрДУ) ўқишни бошладилар.

Ўқув йили бошланиши муносабати билан университет ректори Ирина Фёдоровна Китурко Ҳуқуқни муҳофаза қилиш академияси талабалари билан учрашув ўтказди. Суҳбат давомида ректор университет тарихи ва анъаналари, талабалар учун яратилган таълим, илмий изланиш ва шахсий ривожланиш имкониятлари ҳақида маълумот берди ҳамда ёшларни фаоллик, масъулият ва билимга интилишга чақирди.

Тадбирда Ўзбекистон Республикаси Бош прокуратураси ҳузуридаги Жамоатчилик кенгаши раиси Абдулхай Паттаевич Қаҳҳаров ҳам иштирок этди ва Академия раҳбариятининг самимий саломи ва эзгу тилакларини етказар экан, қўшма дастурнинг икки давлат ўртасидаги илмий ва таълим соҳаларида ҳамкорликни мустаҳкамлашдаги аҳамиятини таъкидлади.

Қўшма таълим дастури тўрт йиллик бўлиб, дастлабки икки йил (1–4 семестрлар) Гродно давлат университети негизида, кейинги икки йил (5–8 семестрлар) эса Ўзбекистон Республикаси Ҳуқуқни муҳофаза қилиш академиясида амалга оширилади.

Таълим жараёни кундузги шаклда, рус тилида ва тўлов-контракт асосида ташкил этилган.

Академия жамоаси талабаларга ўқишда омад, сабот ва илҳом тилайди ҳамда уларнинг келгусидаги касбий фаолиятларида юксак натижаларга эришишига тилакдошдир.