Ҳуқуқни муҳофаза қилиш академиясида дуал таълим: назария ва амалиёт уйғунлиги

Ўзбекистон Республикаси Ҳуқуқни муҳофаза қилиш академиясида таълим дастурлари доирасида бўлажак прокурор-тергов соҳаси мутахассисларини амалий йўналтирилган тарзда тайёрлашга қаратилган дуал таълим тизими тўлақонли жорий этилди.

Мазкур тизим асосида бакалавриатнинг “Тергов фаолияти” таълим йўналиши битирувчи курс талабаларининг касбий амалиёти уларнинг келгусидаги иш жойларида ташкил этилган. Академия профессор-ўқитувчилари раҳбарлигида мамлакат ҳудудларида талабалар ички ишлар ва прокуратура органларининг тергов бўлинмаларига бириктирилиб, бевосита хизмат фаолияти шароитлида таълим олмоқдалар.

Бундай формат талабаларга Академияда эгалланган назарий билимларни амалда қўллаш, касбий кўникмаларини ривожлантириш ҳамда таълим жараёни билан тергов амалиёти ўртасидаги узвий боғлиқликни таъминлаш имконини бермоқда.

Академия профессор-ўқитувчилари дуал таълим модели амалга оширилишида фаол иштирок этмоқда: улар ҳудудий органларга бириктирилган ҳолда амалиётчи ходимлар билан ҳамкорликда машғулотлар ўтказиш, талабаларга амалий топшириқлар бериш ва уларнинг натижаларини баҳолаб бориш ишларини амалга оширмоқда.

Дуал таълим жараёнида талабаларда жиноятларни ўз вақтида аниқлаш ва фош этиш бўйича кўникмаларни шакллантиришга, шунингдек, тергов фаолиятининг замонавий усул ва воситаларини ўзлаштиришга алоҳида эътибор қаратилмоқда. Машғулотлар доирасида талабалар тергов-тезкор гуруҳлари таркибида ҳодиса жойига чиқиш, ҳодисани кўздан кечириш, процессуал ҳаракатларни бажариш ҳамда мустақил равишда процессуал ҳужжатлар лойиҳаларини тайёрлаш кўникмаларини такомиллаштирмоқда.

Дуал таълимнинг бундай шакли талабаларнинг касбий тайёргарлик даражаси ва ташаббускорлигини оширишга, келгусидаги хизмат фаолиятига тез мослашишига ҳамда ҳуқуқни муҳофаза қилиш тизимида самарали ишлаш учун зарур амалий компетенцияларини шакллантиришга хизмат қилади.