Амалиётга йўналтирилган ва дуал таълим — Академиянинг устувор йўналиши

Академияда таълим жараёнлари 50 фоиз назарий машғулотлар ва 50 фоиз амалиётни мужассам этган дуал таълим тизими асосида жорий этилган бўлиб, ҳозирда бакалавриатнинг битирувчи курс талабаларининг касбий амалиёти ҳудудларда, уларнинг келгусидаги иш жойларида давом этмоқда. Академия профессор-ўқитувчилари раҳбарлигида талабалар ҳудудий ички ишлар ва прокуратура органларининг тергов бўлинмаларига бириктирилиб, бевосита хизмат фаолияти шароитида таҳсил олмоқдалар.

Касбий амалиёт жараёнлари Академия раҳбарияти томонидан мувофиқлаштириб борилмоқда. Ўзбекистон Республикаси Бош прокурорининг ўринбосари, Ҳуқуқни муҳофаза қилиш академияси бошлиғи в.в.б.,
3-даражали Давлат адлия маслаҳатчиси С.И.Самадов дуал таълим тизим асосида Андижон вилоятида амалиёт ўтаётган Академия талабалари билан амалий учрашув ўтказди.

Тадбир Андижон шаҳар ички ишлар бошқармасида вилоят прокуратураси ва ИИБ вакиллари иштирокида бўлиб ўтди. Учрашув давомида талабаларнинг амалиёт ўташ жараёнлари, жойлардаги ўқув жараёнлари ҳамда ушбу жараёнлар юзасидан Академиянинг ҳудудий ҳуқуқни муҳофаза қилувчи органлар билан ўзаро ҳамкорлиги масалалари муҳокама қилинди.

С.И.Самадов талабалар билан мулоқот чоғида назарий билимлар ва амалий кўникмалар уйғунлигининг таълим сифатини таъминлашда муҳимлигини таъкидлаб, дуал таълимнинг малакали кадрлар тайёрлашдаги аҳамиятини қайд этди.

Учрашув якунида масъул шахслар ва талабаларга бўлажак кадрларнинг амалий тайёргарлигини янада самарали ташкил этиш бўйича аниқ тавсиялар берилди.