Академия медиатўгараги: очиқлик, ижод ва касбий муваффақият сари илк қадамлар

Ўзбекистон Республикаси Ҳуқуқни муҳофаза қилиш академияси ўз фаолиятини очиқлик ва шаффофлик тамойиллари асосида амалга оширади. Академиянинг расмий веб-сайти ва барча ижтимоий тармоқлардаги саҳифаларида кундалик янгиликлар, расмий хабарлар ҳамда фото ва видеоматериаллар жамоатчиликка етказиб борилади. Академия талабалари иштирокида медиатўгарак ташкил этилган бўлиб, Академия фаолиятига оид ва ҳуқуқий мавзуларда медиаконтент яратиш ишлари йўлга қўйилган.

Бу эса миллий қонунчилигимизга асосан прокуратура фаолиятининг бешта асосий тамойилидан бири – ошкораликни таъминлашга, шунингдек бўлғуси ҳуқуқни муҳофаза қилиш органлари ходимларининг медиасаводхонлигини ошириш, жамоатчилик ва ОАВ билан алоқаларни амалга ошириш юзасидан билим ва кўникмаларини шакллантиришга хизмат қилади.

Академия медиатўгарагининг навбатдаги тадбири кенгайтирилган тарзда ташкил этилиб, унда медиатўгарак ва бакалавриат 1-босқич талабаларининг тўлиқ таркиби қамраб олинди.

Учрашув 1-босқич талабаларида прокуратура ва ҳуқуқни муҳофаза қилиш органлари фаолиятида ахборот очиқлиги ва жамоатчиликка ҳисобдорликнинг аҳамияти ҳақида тушунча ҳосил қилиш, шунингдек, қизиқиши ва иқтидори бўлган талабаларни медиатўгарак ишига жалб қилиш мақсадида ўтказилди.

Тадбир давомида иштирокчиларга Академиянинг фаол ва ижодкор талабаларини бирлаштирувчи “Медиалига” фаолияти тақдимоти бўлиб ўтди. Бу лига ёшларни ахборот хизмати фаолияти, фото ва видеомаҳсулот яратиш, дизайн ҳамда медиаконтент ишлаб чиқиш соҳаларига жалб этишни мақсад қилади.

Медиатўгаракда иштирок этиш талабалар учун Академия ҳаёти ва фаолиятини ёритишда фаол бўлиш, ижодий қобилият ва мулоқот кўникмаларини ривожлантириш, шу билан бирга мазмунли ва қизиқарли талабалик ҳаётини кечириш имконини яратади.

Учрашув интерактив тарзда ўтди, талабалар ва ташкилотчилар замонавий коммуникациялар орқали жамият ишончи ва давлат органлари очиқлигини мустаҳкамлашданинг аҳамияти, Академия медиатўгараги фаолиятини янада кенгайтириш юзасидан фикр алмашдилар.

Тадбир якунида медиатўгаракка янги аъзоларни қабул қилиш жараёни бўлиб ўтди. Ёшлар Академия ҳаёти ҳақида ахборот ва ижтимоий мавзуларни ёритишда фаол иштирок этиш истагини билдирдилар.

Бундай ташаббуслар талабаларда медиасаводхонлик, фуқаролик фаоллиги ва касбий этика кўникмаларини ривожлантиришга хизмат қилади.