Халқаро коррупцияга қарши кураш академияси декани ташрифи

Ҳуқуқни муҳофаза қилиш академиясига Вена шаҳрида жойлашган Халқаро коррупцияга қарши кураш академияси (IACA) декани, ҳуқуқ фанлари доктори (PhD) Слагяна Тасева (Slagjana Taseva)нинг ташрифи бўлиб ўтди 
V Тошкент аксилкоррупция форуми доирасида.

Слагяна Тасева – коррупцияга қарши сиёсат ва жиноят ҳуқуқи соҳасида етакчи эксперт, юридик фанлари доктори, "Transparency International Macedonia" ташкилотининг асосчиси ва илк раиси, шунингдек Шимолий Македония Республикаси Коррупциянинг олдини олиш бўйича Давлат комиссиясининг собиқ раиси ҳисобланади.

Ташриф доирасида Тасева хоним Академия магистратураси тингловчилари учун маъруза ўтказди.

Маърузада у коррупцияга қарши курашиш стратегияларини ишлаб чиқиш ва амалга ошириш бўйича халқаро тажриба билан ўртоқлашди ҳамда шаффофлик ва ҳисобдорлик институтларини мустаҳкамлашда академик ва идоралараро ҳамкорликнинг аҳамиятини таъкидлади.

Академия тингловчилари экспертга коррупциянинг олдини олишда замонавий чақириқлар бўйича саволлар бериб, муҳокамаларда фаол иштирок этишди.

Шунингдек, ташриф доирасида Халқаро коррупцияга қарши кураш академияси вакили билан Академия раҳбарияти ўртасида бўлиб ўтган учрашувда томонлар илмий-тадқиқот фаолияти, кадрлар тайёрлаш ва коррупцияга қарши таълимда энг яхши тажрибалар билан ўзаро алмашиш соҳасидаги ҳамкорлик истиқболларини муҳокама қилдилар.