Оилавий зўравонлик оқибатларининг олдини олиш масалалари муҳокама қилинди

Ҳуқуқни муҳофаза қилиш академиясида “Оилавий зўравонликнинг олдини олиш ва салбий оқибатларини бартараф этиш” мавзусида илмий-амалий конференция бўлиб ўтди. Тадбирда ички ишлар органлари, юридик соҳага оид олий таълим муассасалари, илмий-тадқиқот институтлари ва соғлиқни сақлаш тизими вакиллари, шунингдек Академия ходимлари ва магистратура тингловчилари иштирок этди.

Мазкур конференцияни ташкил этишдан кўзланган асосий мақсад, оилавий-маиший зўравонлик ҳолатларининг ҳуқуқий, ижтимоий ва психологик жиҳатларини чуқур таҳлил қилиш, уларнинг олдини олиш механизмларини муҳокама қилишдан иборат.

Шунингдек, зўравонлик оқибатида аёллар томонидан содир этилаётган жиноятлар ва суицид ҳолатларининг сабаблари, уларни келтириб чиқараётган омилларни аниқлаш ҳамда уларни бартараф этиш бўйича таклиф ва тавсиялар ишлаб чиқилди.

Конференцияда Бош прокуратура, Ички ишлар академияси, Тошкент давлат юридик университети ходимлари, Оила ва гендер тадқиқот институти мутахассислари ҳамда Соғлиқни сақлаш вазирлиги суиқидолог мутахассислари ўз маърузалари билан иштирок этишди. Мулоқот давомида оилавий-маиший зўравонликларнинг криминологик ва виктимологик жиҳатлари, зўравонлик оқибатида аёллар томонидан содир этилаётган жиноятлар таҳлили, аёллар ўртасида ўлим билан боғлиқ ҳолатларнинг олдини олиш, оилавий зўравонлик жиноятлари бўйича суд-тергов амалиётидаги муаммолар, шунингдек суитсид ҳолатларининг олдини олиш ва миллий ҳамда халқаро тажриба масалалари атрофлича муҳокама қилинди.

Бугунги кунда оилавий зўравонлик нафақат алоҳида оила, балки бутун жамият барқарорлигига таъсир кўрсатувчи долзарб муаммолардан бири саналади. Шу боис, бундай илмий-амалий тадбирлар нафақат муаммоларни таҳлил қилиш, балки уларни бартараф этиш йўлида самарали ҳамкорликни йўлга қўйиш учун муҳим аҳамият касб этади.

Конференция якунида иштирокчилар томонидан илгари сурилган таклиф ва тавсиялар оилавий барқарорликни мустаҳкамлаш, инсон ҳуқуқларини ҳимоя қилиш ҳамда ижтимоий адолатни таъминлаш йўлида амалий қадам бўлиши кутилмоқда.