“Очиқ манбалар (OSINT) асосида таҳлил” мавзусида чуқурлаштирилган семинар-тренинг ўтказилди

Маълумки, 2025/2026 ўқув йилидан бошлаб  “Киберхавфсизликни ҳуқуқий таъминлаш” магистратура мутахассислиги жорий этилган бўлиб, ушбу йўналишга қабул қилинган тингловчиларга таълим бериш жараёнига рақамли технологиялар соҳасидаги жиноятларга қарши курашиш йўналишида халқаро мутахассислар ва экспертлар мунтазам жалб этиб борилмоқда.

Мазкур фаолият доирасида Академия Британиянинг Ўзбекистондаги элчихонаси билан ҳамкорликда “Очиқ маълумотлар манбаларига (OSINT) асосан таҳлил қилиш” мавзусида ташкил этган чуқурлаштирилган семинар-тренингнинг 2-босқичи ўтказилди.

Тренинг “Center for Information Resilience (CIR)” халқаро ташкилоти экспертлари Бенжамин ден Брабер, Тим Фармер ва Джек Бишоп томонидан олиб борилди, тингловчилар сифатида Академия профессор-ўқитувчилари ҳамда “Киберхавфсизликни ҳуқуқий таъминлаш” магистратура йўналиши тингловчилари иштирок этди.

Тадбир доирасида қатнашчилар очиқ маълумотлар таҳлилида замонавий OSINT усуллари, гео ва хронолокация, тасвирлар таҳлили, Dark Web муҳитида ишлаш, шифрлаш ва криптовалюта таҳлили бўйича амалий билим ва кўникмаларни мустаҳкамладилар. Шунингдек, “Мураббийни ўргатиш” модули орқали ўқув жараёнини режалаштириш ва баҳолаш усулларини ўзлаштирдилар.

Курс якунида иштирокчиларга сертификатлар топширилди.

Тадбир Академиянинг халқаро ҳамкорликни мустаҳкамлаш, шунингдек, тергов ва тезкор-қидирув фаолиятида очиқ манбали таҳлил технологияларини амалиётга татбиқ этишдаги имкониятларини янада кенгайтиришга хизмат қилади.