“Прокурорнинг ёзма нутқи ва социологик таҳлил” малака ошириш курси бошланди

Ўзбекистон Республикаси Ҳуқуқни муҳофаза қилиш академиясида прокуратура органлари ходимлари учун “Прокурорнинг ёзма нутқи ва социологик таҳлил” мавзусидаги малака ошириш курси бошланди. 

Курс ишдан ажралмаган ҳолда, масофавий форматда ташкил этилган бўлиб, тингловчиларнинг ёзма нутқ маданиятини, ҳужжатларни аниқ ва мантиқий расмийлаштириш кўникмаларини, шунингдек социологик таҳлил асосида ҳуқуқий жараёнларни баҳолаш салоҳиятини ривожлантиришга йўналтирилган.

Масофавий курс машғулотлари давомида прокуратура органлари ходимларининг ёзма нутқ билан боғлиқ касбий компетенцияларини мустаҳкамлашга ва социологик таҳлил кўникмаларини такомиллаштиришга алоҳида эътибор қаратилмоқда. Хусусан, тингловчиларда прокурор ёзма нутқининг турлари ва тузилмаси, ёзма нутқ саводхонлиги ва маданияти, айблов хулосасини тайёрлашда ёзма нутқнинг меъёрий жиҳатлари, юридик терминология ва нормативлик, социологик тадқиқот ўтказиш ва маълумот йиғиш усуллари, сўров ва мониторинг методлари, эмпирик натижаларни қайта ишлаш ва умумлаштириш борасида кўникмалари мустаҳкамланади.

Мазкур ўқув курси прокуратура органлари ходимларининг нутқ маданияти ва ёзма саводхонлигини ошириш, ҳуқуқий ҳужжатларнинг самарадорлигини таъминлаш, жамоатчилик билан очиқ ва ишончли мулоқот ўрнатишига хизмат қилади.