“Қонун – устувор, жазо – муқаррар” мавзусида илмий семинар бўлиб ўтди

Ўзбекистон Республикаси Ҳуқуқни муҳофаза қилиш академиясида “Қонун – устувор, жазо – муқаррар” мавзусида илмий семинар ташкил этилди. 

Тадбирда қонун устуворлигини таъминлашнинг назарий ва амалий жиҳатлари, жиноятчиликка қарши курашишда жазонинг муқаррарлиги тамойилининг аҳамияти, шунингдек, жавобгарликнинг муқаррарлиги билан инсон ҳуқуқ ва эркинликлари ўртасидаги мувозанатни таъминлаш масалалари атрофлича муҳокама қилинди.

Семинар доирасида Академиянинг бакалавриат, магистратура ва докторантура босқичида таҳсил олаётган талаба ва тингловчилар ўзларининг илмий маърузаларини тақдим этишди. Улар томонидан қонун устуворлигини таъминлаш, ҳуқуқни қўллаш амалиётини такомиллаштириш ва адолат тамойилларини мустаҳкамлашга қаратилган илмий таклиф ва тавсиялар билдирилди.

Бундай тадбирлар ёш тадқиқотчиларнинг илмий изланишларга бўлган қизиқишини рағбатлантириш, уларнинг илмий ғояларини амалиёт билан уйғунлаштириш ҳамда ҳуқуқий фикрлаш маданиятини ривожлантиришга хизмат қилади.

Семинар якунида, фаол иштирок этган ва мазмунли маърузалар билан чиқиш қилган ёш олимлар Академия раҳбарияти томонидан ташаккурнома ва эсдалик совғалари билан тақдирланди.