Жиноий активларни қайтариш масалалари бўйича Қирғиз Республикаси Бош прокуратураси билан ҳамкорлик масалалари муҳокама қилинди

Ўзбекистон Республикаси Ҳуқуқни муҳофаза қилиш академияси вакиллари Ғарбий ва Марказий Осиё давлатларининг активларни қайтариш бўйича норасмий тармоғи (ARIN-WCA) доимий Котибиятининг вазифаларини амалга ошириши доирасида Қирғиз Республикаси Бош прокуратураси ходимлари билан жиноий активларни қайтаришда ҳамкорлик масалалари бўйича онлайн ишчи учрашув ўтказишди.

Учрашувда иштирокчилар уюшган жиноятчиликка қарши курашишнинг асосий таркиби сифатида ARIN-WCA тармоғининг ўрни ва аҳамиятини эътироф этишиб, тармоқ доимий Котибияти (Академия) ёрдамида мавжуд жиноят ишлари доирасида хорижий юрисдикцияларга юборилган сўровномалар ҳолати ва мавжуд муаммолар, шунингдек уларни биргаликда бартараф этиш масалалари муҳокама қилинди.

Бундан ташқари, учрашув иштирокчилари жиноий активларни қайтаришда ARIN-WCA тармоғининг самарадорлигини янада ошириш, бошқа ARIN тармоқлари ва хорижий юрисдикциялар билан амалий ҳамкорликни кучайтириш, мазкур соҳада янги билим ва тажрибалар билан алмашиш, алоқа вакиллари учун ўқув қўлланмалар ишлаб чиқиш, тармоқга аъзо давлатлар қонунчилигини ва амалиётини ўрганиш лозимлигини қайд этиб ўтишди.

Тадбир якунлари бўйича иштирокчилар томонидан келгусидаги ҳамкорлик масалалари белгилаб олинди.