Ўзбекистон Республикаси Ҳуқуқни муҳофаза қилиш академияси томонидан “Суд ишларини юритишда сунъий интеллектни жорий этиш истиқболлари” мавзусидаги республика илмий-амалий конференция материаллари тўплами нашр этилди.

Тўпламга суд фаолиятига сунъий интеллект технологияларини жорий этиш, уларни қўллашнинг ҳуқуқий жиҳатлари, халқаро тажриба ва мазкур соҳадаги замонавий тенденциялар ҳақидаги илмий мақолалар ва тезислар киритилган.

Шунингдек, суд иш юритувида сунъий интеллектдан фойдаланишнинг ҳуқуқий асослари, ҳужжат айланмасини автоматлаштириш ва ҳуқуқий таҳлилни рақамлаштириш, электрон суд иш юритувини жорий этиш ҳамда интеллектуал ёрдамчи тизимларнинг имкониятлари масалаларига алоҳида эътибор қаратилган.

Тўпламда хорижий давлатларнинг суд қарорларини қабул қилишда сунъий интеллектдан фойдаланиш тажрибаси, суд амалиётида ахборот хавфсизлигини таъминлаш ва суд-ҳуқуқ тизимини рақамлаштириш жараёнида юзага келиши мумкин бўлган хатарлар ҳамда уларнинг олдини олиш чоралари ёритилган.

Нашрда фан ва таълим соҳасида фаолият юритувчи давлат органлари ва муассасалар вакиллари, юридик фан ва ҳуқуқни қўллаш амалиёти билан боғлиқ ташкилотлар ходимлари, юртимизнинг етакчи ҳуқуқшунос олимлари, профессор-ўқитувчилар, докторантлар, магистрлар, мустақил изланувчилар ҳамда ёш тадқиқотчиларнинг илмий мақолалари ва тезислари жой олган.