Ўзбекистонда коррупцияга қарши курашишга кўмаклашиш дастури доирасида халқаро конференция ташкил этилди

Коррупцияга қарши курашиш давлат дастури доирасида Бош прокуратура Академияси томонидан Иқтисодий ҳамкорлик ва ривожланиш ташкилоти (ИҲРТ) билан ҳамкорликда “Ўзбекистонда коррупцияга қарши курашишга кўмаклашиш” дастури ишга туширилиши муносабати билан халқаро конференция ташкил этилди.

Мазкур дастур Ўзбекистоннинг коррупцион жиноятларни самарали тергов қилиш бўйича ҳуқуқий ва институционал салоҳиятини мустаҳкамлаш ҳамда Коррупцияга қарши курашнинг Истамбул ҳаракатлар режаси ижросини кенгайтиришга қаратилган бўлиб, АҚШнинг Наркотиклар ва ҳуқуқни мухофаза қилиш фаолиятининг халқаро жиҳатлари бўйича бюроси кўмагида молиялаштирилади.

Халқаро конференцияда АҚШ элчихонасининг вақтинчалик ишончли вакили Алан Мелтцер, АҚШнинг Наркотиклар ва ҳуқуқни мухофаза қилиш фаолиятининг халқаро жиҳатлари бўйича бюроси Марказий Осиё бўйича катта маслаҳатчиси Джеймс Каллахан, ИҲРТ молия ва тадбиркорлик бўйича директорати директори ўринбосари Матильда Мэснард, ИҲРТ Антикоррупцион тармоғи котибияти вакиллари, халқаро экспертлар шунингдек, Ўзбекистон Республикаси вазирликлари ва идоралари ходимлари иштирок этишди.

Ўзбекистон Республикаси Бош прокурорининг биринчи ўринбосари Э.Таджиев тадбир иштирокчиларига табрик билан мурожаат қилар экан, коррупцияга қарши курашишнинг ташкилий-ҳуқуқий механизмларини такомиллаштириш ва антикоррупцион чораларнинг самарадорлигини ошириш 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясида белгиланган устувор вазифалардан бири эканлигини таъкидлаб ўтди.

Конференция давомида замонавий механизмларни жорий этиш бўйича халқаро тажриба намойиш этилди ҳамда Ўзбекистондаги антикоррупцион ислоҳотлар,  Бош прокуратура Академиясининг ҳуқуқни муҳофаза қилувчи органлар салоҳиятини оширишдаги роли, ИҲРТ Антикоррупцион тармоғи ва Ўзбекистоннинг глобал муносабатлар стратегияси кўриб чиқилди.

 Конференция барча иштирокчиларда жиддий қизиқиш уйғотди. Давлат органлари  вакиллари ва бошқа қатнашчилар антикоррупцион чораларни амалга ошириш бўйича илғор тажрибалар билан танишишди.