Ўзбекистон Республикаси
Ҳуқуқни муҳофаза қилиш академияси
Рақамли криминалистика соҳасида халқаро тажриба алмашинуви: Академия ходимларининг Молдова Республикасига хизмат сафари
Ўзбекистон Республикаси Ҳуқуқни муҳофаза қилиш академияси Рақамли криминалистика илмий-тадқиқот институти ходимлари рақамли криминалистика соҳасида халқаро тажриба алмашинуви доирасида Молдова Республикасига хизмат сафари амалга оширдилар.
Сафарнинг асосий мақсади рақамли криминалистика соҳасини ривожлантириш, кибержиноятчиликка қарши курашишнинг замонавий усулларини амалиётга жорий этиш ва соҳадаги мутахассисларнинг илмий ҳамда амалий салоҳиятини оширишдан иборат бўлди.
Академия делегацияси Молдова Республикаси Ички ишлар вазирлиги ҳузуридаги Суд-криминалистика экспертизаси марказида бўлиб, лабораториялар фаолияти, аккредитация тизими, моддий-техника таъминоти ва кадрлар салоҳияти билан танишди. Шунингдек, ISO/IEC 17025 ва ISO/IEC 27037 халқаро стандартларини жорий этиш ҳамда менежмент сифатини такомиллаштириш масалалари муҳокама қилинди.
Ташриф давомида рақамли далилларни қабул қилиш, рўйхатга олиш, сақлаш ва уларнинг бутунлигини таъминлаш жараёнлари бўйича тажриба алмашилди. Институт ходимлари рақамли маълумотларни ажратиб олиш, криминалистик нусхалар яратиш ва замонавий ускуналар ёрдамида зарарли дастурий таъминотни таҳлил қилиш бўйича амалий намойишларда иштирок этдилар.
Сафарнинг навбатдаги қисми Миллий тергов инспекциясининг кибержиноятчиликка қарши курашиш марказида бўлиб ўтди. Бу ерда молдавиялик мутахассисларнинг маълумотлар таҳлили, ўчирилган ахборотни тиклаш, мобиль қурилмалардан маълумот олиш, интернет фаолиятини таҳлил қилиш ва тармоқ артефактларини ўрганиш бўйича тажрибаси ўрганилди.
Хизмат сафари натижасида институт ходимлари рақамли далиллар билан ишлаш кўникмаларини оширдилар, кибержиноятчиликни тергов қилишнинг илғор усулларини ўргандилар ҳамда Молдова Республикаси эксперт тузилмалари билан амалий ҳамкорликни мустаҳкамладилар.
Ушбу тажриба алмашинуви натижалари рақамли криминалистика соҳасида илмий-тадқиқот салоҳиятини янада оширишга ва энг илғор халқаро амалиётларни мамлакатимиз ҳуқуқни муҳофаза қилиш органлари фаолиятига жорий этишга хизмат қилади.