Замонавий таълим парадигмаси доирасида коррупцияга қарши маърифат: Ўзбекистон тажрибаси халқаро миқёсда тақдим этилди

Ҳуқуқни муҳофаза қилиш академияси бошлиғининг биринчи ўринбосари, юридик фанлар бўйича фалсафа доктори (PhD), профессор Е.В. Коленко «Интеллектуал ҳамдўстлик кодекси» (IN-CODE) халқаро илмий-таълим конгресси доирасида ўтказилган «Замонавий таълим парадигмаси доирасида коррупцияга қарши маърифат» мавзусидаги эксперт сессияда онлайн форматда иштирок этди.

IN-CODE – бу илмий ва таълим соҳасида фаолият юритаётган олимлар, педагоглар, экспертлар ҳамда давлат идоралари вакилларининг илмий ҳамкорлик ва ягона таълим маконини ривожлантиришга қаратилган халқаро мулоқот майдонидир.

Профессор Коленко ўз маърузасида «Антикоррупциявий таълимнинг янги парадигмаси: фан, технология ва ҳалоллик маданиятини интеграция қилиш» мавзусида сўз юритиб, Ўзбекистонда узлуксиз антикоррупциявий таълим тизимини яратиш, таълим жараёнларини рақамлаштириш ва методик ёндашувларни модернизация қилиш бўйича амалга оширилаётган ислоҳотлар ҳақида маълумот берди. Шунингдек, у ҳалоллик маданиятини шакллантиришда илмий тадқиқотлар, таълим технологиялари ва маънавий-ахлоқий тарбия тизимининг уйғунлигини таъминлаш муҳимлигини таъкидлади.

Эксперт сессияси доирасида МДҲ давлатларининг етакчи илмий-таълим муассасалари, ҳуқуқни муҳофаза қилиш органлари ва халқаро ташкилотлар вакиллари иштирок этдилар.

Мулоқот давомида иштирокчилар антикоррупциявий маърифатни мустаҳкамлаш, илмий-амалий ҳамкорликни фаоллаштириш ва тажриба алмашиш бўйича таклифлар билдирдилар.