Ўқ отиш тайёргарлиги: Академия талабалари касбий кўникмаларини такомиллаштирмоқда

Ҳуқуқни муҳофаза қилиш академиясида талабаларнинг касбий билим ва малакасини ошириш, жисмоний тайёргарлигини мустаҳкамлаш ҳамда келгусидаги хизмат фаолиятига пухта ҳозиргарлик кўриш мақсадида амалий йўналтирилган машғулотлар мунтазам ташкил этилмоқда.

Шу доирада Академияда "Ҳарбий ва жисмоний тайёргарлик" модули асосида "Отиш тайёргарлиги" фанидан амалий маҳорат дарс машғулотлари ўтказилди.

Машғулотларда Миллий гвардиянинг Тошкент ҳудудий ўқув маркази ходими, подполковник И.Умурзақов иштирок этиб, талабаларга отиш жараёнларини ташкил этиш ва бажариш бўйича назарий ва амалий билимлар берди.

Талабалар "Отиш қуролларидан фойдаланиш қоидалари" мавзуси доирасида отишнинг вазифалари ва мазмуни, унинг босқичлари, турлари ва усуллари билан танишдилар. Шунингдек, оддий ва мураккаб шароитларда отишни амалга ошириш ҳамда хавфсизлик қоидаларига риоя этиш бўйича амалий кўникмаларни эгалладилар.

Отиш жараёнидаги муҳим техник ва психологик жиҳатларга алоҳида эътибор қаратилиб, амалий мисоллар орқали тушунтиришлар берилди ва талабаларнинг саволларига атрофлича жавоб қайтарилди.

Мазкур амалий машғулотлар талабаларнинг касбий тайёргарлигини янада ошириш, жисмоний чидамкорлигини мустаҳкамлаш ҳамда Академиянинг куч тузилмалари билан ўзаро ҳамкорлигини ривожлантиришга хизмат қилди.

Бундай машғулотлар келгусидаги ҳуқуқни муҳофаза қилиш фаолиятида зарур бўладиган амалий кўникмаларни шакллантириш, хизматга тайёр ва масъулиятли мутахассисларни тайёрлашга қаратилган.