ARIN-WCA делегациясининг CARIN тармоғи Умумий йиллик йиғилишида иштироки

Буюк Британия раислигида Европол штаб квартирасида Активларни қайтариш бўйича Камден идоралараро тармоғининг (CARIN) навбатдаги Умумий йиллик йиғилиши ўтказилди.

Ушбу йиғилиш 60 дан ортиқ давлат ва халқаро ташкилотлардан 200 га яқин иштирокчини ўз ишида қамраб олиб, жиноий активларни қайтариш ҳамда иқтисодий жиноятларга қарши курашиш бўйича халқаро экспертлар учун музокаралар майдони бўлиб хизмат қилди.

Жумладан, мазкур тадбирда CARIN тармоғига кузатувчи сифатида қўшилган Ғарбий ва Марказий Осиё давлатларининг активларни қайтариш бўйича ноформал тармоғи (ARIN-WCA) делегацияси – тармоқда жорий йилда Раислик қилувчи давлат (Тожикистон Республикаси) ҳамда доимий фаолият юритувчи Котибият (Ҳуқуқни муҳофаза қилиш академияси) вакиллари ҳам иштирок этишди.

Тадбир Европол (EUROPOL) ва Сивипол (CIVIPOL) кўмагида, Буюк Британия Қироллик прокуратураси (CPS) ҳамда Жиноятларга қарши курашиш миллий агентлиги (NCA) томонидан ташкил қилнди.

Йиғилишнинг асосий мақсади – 2025 йилда жиноий йўл билан топилган активларни қайтариш ва пул ювишга қарши курашда самарали халқаро ҳамкорлик, ушбу соҳада мавжуд муаммолар ҳамда уларнинг ечимлари шунингдек янги замонавий чақириқларни муҳокама қилиш ҳисобланади.

Уч кун давомида иштирокчилар активларни қайтариш ва молиявий разведка бўйича халқаро расмий ва норасмий тармоқлар фаолиятини ривожлантириш, виртуал активлардан фойдаланиш ва рақамли иқтисодиётнинг янги чақириқлари, айблов ҳукмисиз активларни қайтариш амалиёти (Non-Conviction Based Asset Recovery), Европа Иттифоқининг активларни қайтариш бўйича янги директивалари, шунингдек ушбу ташкилот янги тузилмалари билан ҳамкорлик масалаларини, CARIN тармоғининг 2026–2029 йилларга мўлжалланган янги стратегиясини муҳокама қилишди.

Сессияларидан ташқари, дастур доирасида панель муҳокамалар, жамоавий ишни ривожлантириш ва касбий алоқаларни мустаҳкамлашга қаратилган интерактив ўйинлар, ARIN тармоқларининг презентациялари ҳам ўтказилди. Хусусан, йиғилишда ARIN-WCA номидан, тармоқнинг доимий Котибияти (Ўзбекистон Республикаси Ҳуқуқни муҳофаза қилиш академияси) вакили томонидан ARIN-WCAнинг фаолияти, амалга оширилган ишлар ва истиқболли режалар юзасидан тақдимоти амалга оширилди.

Тадбир ишчан ва конструктив руҳда ўтказилиб, иштирокчилар келгусида фаол ҳамкорлик қилиш ва ARIN доирасида алоқаларни янада мустаҳкамлашга келишиб олишди.