Британиялик эксперт маърузаси ҳамда Тараққиёт ва одил судлов маркази вакиллари билан учрашув

Ўзбекистон Республикаси Ҳуқуқни муҳофаза қилиш академиясида жиноий одил судлов соҳасидаги етакчи британиялик эксперт Марк Диксон иштирокида маъруза ташкил этилди. Тадбир Тошкентдаги Буюк Британия элчихонаси ҳамда Тараққиёт ва одил судлов халқаро маркази кўмагида ўтказилди.

М.Диксон Академия тингловчилари учун «Жиноят ишлари тергови доирасида сўроқ қилишга оид PEACE модели ва унга оид халқаро стандартлар» мавзусида маъруза қилди. Маърузада Буюк Британияда сўроқ қилишда қўлланилаётган PEACE моделининг мақсади, тузилиши ва босқичлари, унинг халқаро стандартлар билан уйғунлиги бўйича батафсил тушунтириш берилиб, сўроқ ўтказишнинг илғор усулларини амалиётга жорий этиш масалалари юзасидан ўзаро фикр алмашинди.

Шунингдек, ташриф доирасида Тараққиёт ва одил судлов халқаро маркази раҳбари Азамат Шамбилов билан икки томонлама учрашув бўлиб ўтди. Учрашувда меҳмонларга Академия фаолиятининг асосий йўналишлари, замонавий таълим инфратузилмаси, илмий-таҳлилий фаолият ҳақида маълумот берилди ҳамда ўзаро ҳамкорлик истиқболлари муҳокама қилинди.

Маълумот учун, Тараққиёт ва одил судлов халқаро маркази (CDJI) нодавлат нотижорат ташкилот бўлиб, унинг фаолияти Марказий Осиё мамлакатларида одил судловни мустаҳкамлаш, инсон ҳуқуқларини илгари суриш ва инклюзив давлат бошқарувини ривожлантиришга қаратилган.