“Тадбиркорлик субъектлари фаолиятини давлат томонидан назорат қилиш тўғрисида”ги Қонун лойиҳаси муҳокамаси ўтказилди

Бош прокуратура Академиясида “Тадбиркорлик субъектлари фаолиятини давлат томонидан назорат қилиш тўғрисида”ги Қонун лойиҳаси муҳокамаси ўтказилди. Тадбирда икки юздан ортиқ бизнес ҳамжамият, халқаро компаниялар, ассоциациялар вакиллари, шунингдек депутатлар, прокуратура ва давлат солиқ хизмати ходимлари иштирок этди.

Қонун лойиҳаси Ўзбекистон Республикаси Президентининг 2018 йил 27 июлдаги “Тадбиркорлик субъектларининг ҳуқуқлари ва қонуний манфаатларини ҳимоя қилиш тизимини янада такомиллаштириш чора-тадбирлари тўғрисида”ги Фармони ижросини таъминлаш мақсадида ишлаб чиқилган.

Қонун лойиҳасини ишлаб чиқишдан мақсад тадбиркорлик субъектлари фаолиятини давлат томонидан назорат қилишнинг асосий тамойиллари, асослари ва амалга ошириш тартибини мустаҳкамлашдан иборат.

Тадбирда Бош прокуратура ходимлари томонидан Қонун лойиҳасининг “хавфни таҳлил этиш” тизимини жорий этиш орқали давлат назоратини амалга оширишнинг замонавий усулларини назарда тутувчи нормалари атрофлича тушунтирилди, тадбиркорлик субъектларининг ҳуқуқ ва мажбуриятларига оид масалалар кўриб чиқилди, текширувдан кейинги таҳлил тизимига баҳо берилди, шунингдек, назорат қилувчи органлар фаолияти самарадорлигини баҳолашнинг мезонлари тушунтирилди.

Тадбир давомида Текширувларни электрон рўйхатга олиш ягона тизими (ТЭРОЯТ)нинг тақдимоти ҳам ўтказилди. Тадбиркорлик субъектлари фаолиятида ўтказиладиган барча текширувлар ТЭРОЯТда рўйхатга олиниши шарт бўлиб, ўтказилган текширувларнинг натижалари назорат қилувчи органлар томонидан ТЭРОЯТга киритилади. Бунда  тадбир иштирокчиларига тизимда рўйхатга олинмаган текширувлар ноқонуний ҳисобланиши, тадбиркорлик субъектларига ўтказилаётган текширув ҳақидаги ахборотни қисқа хабар (SMS) кўринишида ҳамда реал вақт режимида Интернет тармоғи орқали олиш имконияти берилганлиги тушунтирилди.

Тадбир давомида Қонун лойиҳаси иштирокчилар томонидан қизғин муҳокама қилинди ҳамда уни янада такомиллаштириш юзасидан тегишли таклифлар берилди.

Шуни қайд этиш лозимки, Қонун лойиҳаси Ягона интерактив давлат хизматлари порталига (regulation.gov.uz) жамоатчилик муҳокамаси учун жойлаштирилган, лойиҳа бўйича таклиф ва мулоҳазалар 2018 йил 28 декабргача бўлган муддатда қабул қилинади.