БМТнинг Коррупцияга қарши конвенцияси бажарилиши бўйича иккинчи босқич обзорида иштирок этилди

Ўзбекистон Республикаси 2008 йилда БМТнинг Коррупцияга қарши конвенциясига қўшилганидан буён, миллий қонунчилигини халқаро стандартларга мослаштириш бўйича ишлар изчил давом эттирилмоқда.

БМТнинг Коррупцияга қарши конвенциясининг
63-моддасига биноан БМТнинг Гиёҳвандлик ва жиноятчилик бошқармаси ҳамда Нигерия ва Мальдив Республикаси томонидан жорий йилнинг 17–21 ноябрь кунлари Ўзбекистонда Конвенциянинг қоидалари бажарилиши бўйича иккинчи босқич обзори ўтказилмоқда.

Мониторингда Конвенциянинг II ва V боблари қоидалари, хусусан коррупциянинг олдини олиш сиёсати, коррупцияга қарши курашувчи органлар, суд ва прокуратура органлари, давлат ва хусусий секторлар, давлат хизматчиларининг одоб-ахлоқ кодекслари, давлат харидлари ва маблағларни бошқариш, ҳисобдорлик, жамоатчилик иштироки, шунингдек жиноий даромадларни легаллаштиришга қарши курашиш ва активларни қайтариш бўйича чора-тадбирлар мамлакат қонунчилигида ва амалиётида жорий этилганлиги кўриб чиқилмоқда.

Мазкур қоидаларнинг бажарилиши бўйича БМТ ва хорижий ўрганувчи экспертлар билан ўтказилаётган учрашувлар ва муҳокамаларда Коррупцияга қарши курашиш агентлиги, Бош прокуратура, Ҳуқуқни муҳофаза қилиш академияси, бошқа вазирлик ва идоралар масъул вакиллари иштирок этди.

Хусусан, мониторингда иштирок этган Академия бошлиғининг биринчи ўринбосари Евгений Коленко БМТ Ковенциясининг 6, 7, 8 ва 13-моддаларда коррупцияга қарши курашишга ваколатли бўлган органлар вакилларини тайёрлаш ва ўқитиш, давлат хизматчиларининг коррупцияга қарши курашиш, манфаатлар тўқнашувини бартараф этиш, одоб-ахлоқ қоидаларини қўллаш бўйича малакасини ошириш, шунингдек аҳоли, нодавлат нотижорат вакилларини коррупцияга қарши курашиш борасидаги салоҳиятини ошириш, шунингдек ёшлар онгида ҳалоллик қадриятларини сингдириш бўйича амалга оширилган ишлар юзасидан экспертларнинг саволларига жавоб берди.

Экспертларга жорий йилнинг январь ойидан ишга туширилган “Коррупцияга қарши курашиш виртуал академияси” электрон платформаси орқали давлат хизматчилари учун ташкил этилаётган коррупцияга қарши курашиш соҳасидаги махсус ўқув курслари ҳамда мактабгача таълим муассасалари тарбияланувчилари, мактаб ўқувчилари ва талабалар учун махсус ўқув дастурлари орқали олиб борилаётган ўқув тадбирлари катта қизиқиш уйғотди.