«Замонавий чақириқлар шароитида қонун устуворлигини таъминлаш: муаммолар ва ечимлар» халқаро илмий-амалий конференция АНОНСИ

Ўзбекистон Республикаси Ҳуқуқни муҳофаза қилиш академиясида жорий йилнинг 27–28 ноябрь кунлари, Академия ташкил этилганининг уч йиллигига бағишлаб ўтказилаётган академик декада доирасида «Замонавий чақириқлар шароитида қонун устуворлигини таъминлаш: муаммолар ва ечимлар» мавзусида халқаро илмий-амалий конференция бўлиб ўтади.

Конференция ташкилотчиси – Ўзбекистон Республикаси Ҳуқуқни муҳофаза қилиш академияси бўлиб, тадбир GIZ, Ўзбекистондаги ЕХҲТ лойиҳалари координатори, Европа Иттифоқи, БМТнинг Гиёҳвандлик ва жиноятчилик бўйича бошқармаси (UNODC) ва бошқа халқаро ҳамкорлар кўмагида ташкил этилмоқда.

Конференцияда Бош прокуратура, Олий суд, Ички ишлар вазирлиги, Миллий гвардия, Давлат божхона қўмитаси, Олий таълим, фан ва инновациялар вазирлиги, Инсон ҳуқуқлари бўйича Миллий марказ, Коррупцияга қарши курашиш агентлиги, шунингдек Марказий Осиё мамлакатларининг ҳуқуқни муҳофаза қилиш органлари академиялари ва ўқув муассасалари вакиллари иштирок этадилар. Тадбирда халқаро ташкилотлар ва экспертлар кенг иштирок этиши кутилмоқда – 30 дан ортиқ давлатдан 120 нафар етакчи экспертлар, жумладан БМТ, ОБСЕ, Европа Иттифоқи, Халқаро миграция ташкилоти, ЮНЕСКО, Халқаро прокурорлар ассоциацияси ва бошқа тузилмалар вакиллари иштирок этади.

Тадбир дастури ялпи мажлис ва олтита параллел сессиядан иборат бўлиб, қонун устуворлигини таъминлашнинг рақамли даврдаги муҳим йўналишлари: жиноий даромадларни легаллаштириш ва терроризмни молиялаштиришга қарши кураш (ПОД/ФТ), ҳуқуқни муҳофаза қилиш фаолиятида илм-фан ва таълимни ривожлантириш, коррупция ва коррупциявий хавфларнинг олдини олиш, сунъий интеллектни ҳуқуқий тартибга солиш, кибержиноятчиликка қарши курашиш, шунингдек миграция, одам савдоси ва рақамли муҳитда инсон ҳуқуқларини таъминлаш масалаларини қамраб олади. Тадбир давомида халқаро тажриба алмашиш, замонавий таҳдидларни муҳокама қилиш ва ҳуқуқни муҳофаза қилиш ҳамда давлат органлари учун амалий тавсиялар ишлаб чиқишга алоҳида эътибор қаратилади.

Халқаро тадбир доирасида, шунингдек, Академия ҳамда халқаро ва миллий ҳамкорлар ўртасида икки томонлама учрашувлар ва музокаралар ўтказилиши, ўзаро ҳамкорликни кенгайтиришга қаратилган меморандум ва келишувлар имзоланиши режалаштирилган.

Ушбу конференция давлат органлари, илмий жамоатчилик ва халқаро ҳамкорлар ўртасида очиқ мулоқот майдончасини яратиш, шунингдек Ўзбекистон ва бутун минтақа миқёсида қонун устуворлигини ва инсон ҳуқуқларини янада мустаҳкамлашга хизмат қилишни мақсад қилади.

Конференция материаллари махсус тўплам шаклида нашр этилиши режалаштирилган.

Тадбирга ОАВ вакилларини таклиф этамиз, иштирок этмоқчи бўлганлар қуйидаги ҳавола бўйича рўйхатдан ўтишлари мумкин.