«Zamonaviy chaqiriqlar sharoitida qonun ustuvorligini ta’minlash: muammolar va yechimlar» xalqaro ilmiy-amaliy konferensiya ANONSI

O‘zbekiston Respublikasi Huquqni muhofaza qilish akademiyasida joriy yilning 27–28 noyabr kunlari, Akademiya tashkil etilganining uch yilligiga bag‘ishlab o‘tkazilayotgan akademik dekada doirasida «Zamonaviy chaqiriqlar sharoitida qonun ustuvorligini ta’minlash: muammolar va yechimlar» mavzusida xalqaro ilmiy-amaliy konferensiya bo‘lib o‘tadi.

Konferensiya tashkilotchisi – O‘zbekiston Respublikasi Huquqni muhofaza qilish akademiyasi bo‘lib, tadbir GIZ, O‘zbekistondagi YEXHT loyihalari koordinatori, Yevropa Ittifoqi, BMTning Giyohvandlik va jinoyatchilik bo‘yicha boshqarmasi (UNODC) va boshqa xalqaro hamkorlar ko‘magida tashkil etilmoqda.

Konferensiyada Bosh prokuratura, Oliy sud, Ichki ishlar vazirligi, Milliy gvardiya, Davlat bojxona qo‘mitasi, Oliy ta’lim, fan va innovatsiyalar vazirligi, Inson huquqlari bo‘yicha Milliy markaz, Korrupsiyaga qarshi kurashish agentligi, shuningdek Markaziy Osiyo mamlakatlarining huquqni muhofaza qilish organlari akademiyalari va o‘quv muassasalari vakillari ishtirok etadilar. Tadbirda xalqaro tashkilotlar va ekspertlar keng ishtirok etishi kutilmoqda – 30 dan ortiq davlatdan 120 nafar yetakchi ekspertlar, jumladan BMT, OBSE, Yevropa Ittifoqi, Xalqaro migratsiya tashkiloti, YUNESKO, Xalqaro prokurorlar assotsiatsiyasi va boshqa tuzilmalar vakillari ishtirok etadi.

Tadbir dasturi yalpi majlis va oltita parallel sessiyadan iborat bo‘lib, qonun ustuvorligini ta’minlashning raqamli davrdagi muhim yo‘nalishlari: jinoiy daromadlarni legallashtirish va terrorizmni moliyalashtirishga qarshi kurash (POD/FT), huquqni muhofaza qilish faoliyatida ilm-fan va ta’limni rivojlantirish, korrupsiya va korrupsiyaviy xavflarning oldini olish, sun’iy intellektni huquqiy tartibga solish, kiberjinoyatchilikka qarshi kurashish, shuningdek migratsiya, odam savdosi va raqamli muhitda inson huquqlarini ta’minlash masalalarini qamrab oladi. Tadbir davomida xalqaro tajriba almashish, zamonaviy tahdidlarni muhokama qilish va huquqni muhofaza qilish hamda davlat organlari uchun amaliy tavsiyalar ishlab chiqishga alohida e’tibor qaratiladi.

Xalqaro tadbir doirasida, shuningdek, Akademiya hamda xalqaro va milliy hamkorlar o‘rtasida ikki tomonlama uchrashuvlar va muzokaralar o‘tkazilishi, o‘zaro hamkorlikni kengaytirishga qaratilgan memorandum va kelishuvlar imzolanishi rejalashtirilgan.

Ushbu konferensiya davlat organlari, ilmiy jamoatchilik va xalqaro hamkorlar o‘rtasida ochiq muloqot maydonchasini yaratish, shuningdek O‘zbekiston va butun mintaqa miqyosida qonun ustuvorligini va inson huquqlarini yanada mustahkamlashga xizmat qilishni maqsad qiladi.

Konferensiya materiallari maxsus to‘plam shaklida nashr etilishi rejalashtirilgan.

Tadbirga OAV vakillarini taklif etamiz, ishtirok etmoqchi bo‘lganlar quyidagi havola bo‘yicha ro‘yxatdan o‘tishlari mumkin.