Ўзбекистон Республикасининг 2018 йил коррупцияга қарши ислоҳотлари: ютуқлар ва устуворликлар

Жорий йилнинг 13-14 декабр кунлари International Hotel Tashkent меҳмонхонасида Халқаро коррупцияга қарши кураш кунига бағишланган ҳафталик медиа-марафон доирасида Ўзбекистон Республикаси Бош прокуратураси БМТнинг гиёҳванд моддалар ва жиноятчилик бўйича идораси, Бирлашган Миллатлар Ташкилоти Тараққиёт Дастури (БМТ ТД), Европада хавфсизлик ва ҳамкорлик ташкилоти (ЕХҲТ), “Регионал Диалог” ХНДТ билан ҳамкорликда “Ўзбекистон Республикасининг 2018 йил коррупцияга қарши ислоҳотлари: ютуқлар ва устуворликлар” мавзусида халқаро конференция бўлиб ўтди.

Тадбирда БМТнинг Ўзбекистондаги доимий вакили Хелена Фрейзер, БМТнинг гиёҳванд моддалар ва жиноятчилик бўйича идораси Марказий Осиёдаги минтақавий вакили Ашита Миттал, ЕХҲТнинг Ўзбекистондаги лойиҳалари координатори ҳамда Бош прокуратура Академияси бошлиғи Евгений Коленко сўзга чиқди.

Халқаро экспертлар Анга Тимилсин (БМТ ТД глобал Дастурининг коррупцияга қарши кураш бўйича маслаҳатчиси), Аида Арутюнова (Дастур менеджери), Иракли Котетишвили (БМТ ТД Глобал дастурининг коррупцияга қарши кураш бўйича вакили), Ярослав Стрельченок (ЕХҲТ эксперти), Константин Поликарски (БМТнинг Гиёҳванд моддалар ва жиноятчилик бўйича идораси эксперти) ва Горан Клеменчич (“Регионал диалог” ХНДТ эксперти) билан бирга Ўзбекистон Республикаси вазирликлари ва идоралари вакиллари коррупцияга алоқадор турли мавзулар доирасида муҳокамалар олиб бордилар.

Анжуман якунида иштирокчилар Ўзбекистон Республикасининг коррупцияга қарши кураш бўйича ислоҳотларини ривожлантиришга қаратилган келгусидаги ҳамкорлик алоқаларини белгилаб олдилар.