Академия THE Interdisciplinary Science Rankings 2026 халқаро рейтингида эътироф этилди

Ўзбекистон Республикаси Ҳуқуқни муҳофаза қилиш академияси Times Higher Education Interdisciplinary Science Rankings (ISR) 2026 халқаро рейтингида эътироф этилиб, “репортёр” мақомини олди. Ушбу натижа Академияда ривожланиб бораётган фанлараро тадқиқотларга берилган юқори баҳо бўлиб, замонавий илм-фаннинг асосий тенденцияларидан бири сифатида эътироф этилган йўналишга қаратилган эътиборнинг ортиб бораётганини кўрсатади.

ISR 2026 рейтинги қамровини кенгайтиришда давом этиб, 94 та давлат ва ҳудуддан 911 та университетни қамраб олган. Лойиҳанинг ўзига хос жиҳати шундаки, у олий таълим муассасаларининг айнан фанлараро тадвивотларга қўшган ҳиссасини баҳолайди. Рейтинг методологияси 11 та индикаторга асосланиб, илмий жараённинг барча босқичларини: ресурслар ва илмий салоҳият,тадқиқотлар фаолияти ва олимларнинг натижадорлиги,халқаро нуфуз ва илмий таъсир кабиларни қамраб олади.

Академиянинг мазкур рўйхатга киритилиши институционал ривожланишнинг барқарор динамикаси, халқаро илмий майдонга изчил интеграция ва фанлараро йўналишларни ривожлантириш бўйича амалга оширилаётган ишларнинг долзарблигини тасдиқлайди.

Фанлараро тадқиқотлар ҳуқуқни муҳофаза қилиш соҳасини модернизация қилишда муҳим ўрин тутади. Бу эса Академиянинг стратегик мақсадлари – юқори малакали кадрлар тайёрлаш, илмий салоҳиятни мустаҳкамлаш ва қонун устуворлиги ҳамда ҳуқуқ-тартиботни таъминлаш соҳасида инновацияларни илгари суриш билан тўла мос келади.

THE Interdisciplinary Science Rankings рейтингига киритилиши Академияга янги халқаро ҳамкорлик имкониятларини очади, унинг академик нуфузини кенгайтиради ва глобал илмий майдондаги позициясини янада мустаҳкамлайди.