Akademiya THE Interdisciplinary Science Rankings 2026 xalqaro reytingida e’tirof etildi

O‘zbekiston Respublikasi Huquqni muhofaza qilish akademiyasi Times Higher Education Interdisciplinary Science Rankings (ISR) 2026 xalqaro reytingida e’tirof etilib, “reportyor” maqomini oldi. Ushbu natija Akademiyada rivojlanib borayotgan fanlararo tadqiqotlarga berilgan yuqori baho bo‘lib, zamonaviy ilm-fanning asosiy tendensiyalaridan biri sifatida e’tirof etilgan yo‘nalishga qaratilgan e’tiborning ortib borayotganini ko‘rsatadi.

ISR 2026 reytingi qamrovini kengaytirishda davom etib, 94 ta davlat va hududdan 911 ta universitetni qamrab olgan. Loyihaning o‘ziga xos jihati shundaki, u oliy ta’lim muassasalarining aynan fanlararo tadvivotlarga qo‘shgan hissasini baholaydi. Reyting metodologiyasi 11 ta indikatorga asoslanib, ilmiy jarayonning barcha bosqichlarini: resurslar va ilmiy salohiyat, tadqiqotlar faoliyati va olimlarning natijadorligi, xalqaro nufuz va ilmiy ta’sir kabilarni qamrab oladi.

Akademiyaning mazkur ro‘yxatga kiritilishi institutsional rivojlanishning barqaror dinamikasi, xalqaro ilmiy maydonga izchil integratsiya va fanlararo yo‘nalishlarni rivojlantirish bo‘yicha amalga oshirilayotgan ishlarning dolzarbligini tasdiqlaydi.

Fanlararo tadqiqotlar huquqni muhofaza qilish sohasini modernizatsiya qilishda muhim o‘rin tutadi. Bu esa Akademiyaning strategik maqsadlari – yuqori malakali kadrlar tayyorlash, ilmiy salohiyatni mustahkamlash va qonun ustuvorligi hamda huquq-tartibotni ta’minlash sohasida innovatsiyalarni ilgari surish bilan to‘la mos keladi.

THE Interdisciplinary Science Rankings reytingiga kiritilishi Akademiyaga yangi xalqaro hamkorlik imkoniyatlarini ochadi, uning akademik nufuzini kengaytiradi va global ilmiy maydondagi pozitsiyasini yanada mustahkamlaydi.