EU-ACT делегациянинг Академияга ташрифи

Ўзбекистон Республикаси Ҳуқуқни муҳофаза қилиш академиясига Европа Иттифоқининг Марказий Осиё бўйича уюшган жиноятчилик ва терроризмга қарши кураш лойиҳасининг (EU-ACT) директор Мария Санчес Гиль-Сепада бошчилигидаги делегацияси ташриф буюрди.

Ташриф доирасида делегация аъзолари Академиянинг тузилмаси, таълим, илмий-таҳлилий ва методик фаолияти, шунингдек прокуратура ва тергов органлари ходимларини тайёрлаш, қайта тайёрлаш ва малакасини ошириш тизими билан яқиндан танишдилар.

Учрашувда томонлар амалга оширилаётган қўшма ташаббуслар натижаларини муҳокама қилдилар, шунингдек прокурор-тергов кадрларининг касбий салоҳиятини мустаҳкамлашга қаратилган лойиҳаларни кенгайтириш бўйича келгуси режаларни белгиладилар.

Ташриф давомида меҳмонлар Академия жамоасини унинг ташкил этилганига уч йил тўлиши муносабати билан табриклаб, яқинлашиб келаётган халқаро конференциянинг муваффақиятли ўтказилишига тилакдош бўлдилар.

Ташриф якунига кўра, томонлар илмий-маърифий соҳадаги ҳамкорликни янада кенгайтириш ва янги ташаббусларни амалга оширишга тайёр эканликларини тасдиқладилар.