EU-ACT delegatsiyaning Akademiyaga tashrifi

O‘zbekiston Respublikasi Huquqni muhofaza qilish akademiyasiga Yevropa Ittifoqining Markaziy Osiyo bo‘yicha uyushgan jinoyatchilik va terrorizmga qarshi kurash loyihasining (EU-ACT) direktor Mariya Sanches Gil-Sepada boshchiligidagi delegatsiyasi tashrif buyurdi.

Tashrif doirasida delegatsiya a’zolari Akademiyaning tuzilmasi, ta’lim, ilmiy-tahliliy va metodik faoliyati, shuningdek prokuratura va tergov organlari xodimlarini tayyorlash, qayta tayyorlash va malakasini oshirish tizimi bilan yaqindan tanishdilar.

Uchrashuvda tomonlar amalga oshirilayotgan qo‘shma tashabbuslar natijalarini muhokama qildilar, shuningdek prokuror-tergov kadrlarining kasbiy salohiyatini mustahkamlashga qaratilgan loyihalarni kengaytirish bo‘yicha kelgusi rejalarni belgiladilar.

Tashrif davomida mehmonlar Akademiya jamoasini uning tashkil etilganiga uch yil to‘lishi munosabati bilan tabriklab, yaqinlashib kelayotgan xalqaro konferensiyaning muvaffaqiyatli o‘tkazilishiga tilakdosh bo‘ldilar.

Tashrif yakuniga ko‘ra, tomonlar ilmiy-ma’rifiy sohadagi hamkorlikni yanada kengaytirish va yangi tashabbuslarni amalga oshirishga tayyor ekanliklarini tasdiqladilar.