Молиявий фирибгарлик ва жиноий даромадларни легаллаштиришга қарши курашиш масалаларида амалий семинар ўтказилди

Академияда БМТнинг Гиёҳвандлик ва жиноятчилик бўйича бошқармаси (UNODC) ҳамда БМТнинг Тараққиёт дастури (UNDP) билан ҳамкорликда ва Европа Иттифоқининг молиявий кўмагида тижорат банклари комплаенс хизматлари учун “Дроп” карталардан фойдаланган ҳолда фирибгарлик ва жиноий даромадларни легаллаштириш ҳолатларини аниқлаш, олдини олиш ва тергов қилиш” мавзусида амалий семинар ўтказилди.

Семинарда республикадаги тижорат банкларининг 26 нафар комплаенс мутахассиси, шунингдек Марказий банк, Коррупцияга қарши курашиш агентлиги ва Ҳуқуқни муҳофаза қилиш академиясининг масъул ходимлари иштирок этди.

Тадбирнинг асосий мақсади иштирокчиларда молиявий фирибгарликнинг янги схемалари, “дроп-карталар”дан фойдаланиш орқали жиноий даромадларни легаллаштириш ҳолатлари ва уларнинг олдини олиш бўйича назарий билим ва амалий кўникмаларни оширишдан иборат бўлди.

Семинар давомида “дроп-карталар” орқали амалга ошириладиган фирибгарлик ҳолатларининг типология ва схемалари, жумладан молиявий пирамидалар, онлайн фирибгарлик ва кибержиноятларда қўлланиладиган усуллар атрофлича ёритилди.

Сессиялар UNODC халқаро экспертлари Ардак Мукашева ва жиноий даромадларни легаллаштириш ва терроризмни молиялаштиришга қарши кураш бўйича минтақавий маслаҳатчи Александр Водяной томонидан олиб борилди. Мутахассислар иштирокчиларга шубҳали операциялар хулқ-атвори ва индикаторлари, операциянинг якуний бенефициарини аниқлаш услублари, мижозни кучайтирилган текшириш чоралари, маблағлар манбасини таҳлил қилиш, транзакцияларни мониторинг қилиш ва рақамли изларни тавсифлаш бўйича илғор амалиётларни тақдим этди.

Семинар, шунингдек, молиявий разведка ва ҳуқуқни муҳофаза қилиш органлари ўртасидаги ўзаро ҳамкорлик механизмларини мустаҳкамлашга хизмат қилди.

Тадбир давомида ишлаб чиқилган материаллар ва ўқув ресурслари Коррупцияга қарши виртуал академия платформасига интеграция қилиниб, миллий мутахассисларнинг малакасини ошириш жараёнларида қўлланилади.

Эслатиб ўтамиз, тадбир Ҳуқуқни муҳофаза қилиш академияси ташкил этилганининг уч йиллигига бағишланган академик декада доирасида ўтказилди.

Декада дастуридан қонун устуворлигини мустаҳкамлаш, ҳуқуқни муҳофаза қилувчи органлар ходимларининг касбий компетенцияларини ривожлантириш, замонавий таҳдидларга қарши курашиш ва халқаро ҳамкорликни кенгайтиришга қаратилган халқаро, илмий-амалий ва ўқув тадбирлари ўрин олган.